ۇلت اسپاپتار وركەسترىندە كوزى ناشار كورەتىن جانە زاعيپ 30 بالا بار. ولاردىڭ بارلىعى دا الماتىدا ورنالاسقان №4 ن.وستروۆسكيي اتىنداعى ينتەرنەتتىڭ تاربيەلەنۋشىلەرى. بالالار ولەڭ ايتادى، اسپاپتاردا وينايدى، كونسەرتتەر وتكىزەدى. ولار ءۇشىن مۋزىكا جاي عانا ۋاقىت وتكىزۋگە ارنالعان قىزىعۋشىلىق ەمەس، بۇل – بولاشاقتا اينالىساتىن كاسىبى. مۋزىكامەن اينالىسقىسى كەلەتىندەردىڭ قاتار كۇن ساناپ ارتىپ وتىر، ءبىراق اسپاپ بارىنە بىردەي جەتە بەرمەيدى. وسىنداي ماسەلەنى كورگەن مۋزىكانت دانا مەيىربەكوۆا وقۋشىلارعا كومەكتەسۋدىڭ جولىن قاراستىردى.
«ينكليۋزيۆتى ءبىلىم الاتىن بالالارعا ارنالعان بايقاۋدا قازىلار اقاسىنىڭ مۇشەسى بولدىم، سول كەزدە وسى وركەستر تۋرالى ءبىلدىم. بالالار تاعدىرىنا شاعىم ايتپاي، ءوز بەتتەرىمەن ءومىر ءسۇرۋدى ۇيرەنۋگە تالپىنعاندارى شابىتتاندىردى. بۇگىن وركەستر ۇزدىك شىعارمالارىن ورىندايدى. كورەرمەن جاس مۋزىكانتتاردىڭ تالپىنىسىن باعالاپ، قاجەتتى اسپاپتى ساتىپ الۋعا قول ۇشىن سوزادى دەپ ويلايمىن. بالالاردى قولداي وتىرىپ، كونسەرتكە ءوزىم، ۇلىم جانە مۋزىكانت دوستارىم دا قاتىسادى. بۇل ءىس-شارانى «اتامەكەنىم» اكسياسىنىڭ اياسىندا وتكىزىپ وتىرمىز. بىلتىر الماتى قالاسى كاسىپكەرلەر پالاتاسىندا كۋرستان ءوتتىم. بىزگە قولداۋ كورسەتتى، «Art Mobile» ءموبيلدى ونەر مەكتەبىنىڭ اشىلۋىنا ارنايى گرانت ۇتىپ الدىق. ءبىز ەندى بيزنەستىڭ وكىلىمىز، وسىلايشا ءوزىمىزدىڭ الەۋمەتتىك جاۋاپكەرشىلىگىمىزدى كورسەتەمىز»، - دەپ باياندادى دانا مەيىربەكوۆا.
ن.وستروۆسكيي اتىنداعى زاعيپ جانە كوزدەرى ناشار كورەتىن بالالارعا ارنالعان مەكتەپ-ينتەرناتتىڭ تاربيەلەنۋشىسى ەرمەك بايسالبەكوۆتىڭ ايتۋىنشا، ەكىنشى سىنىپتا وقىپ جۇرگەندە قانداي اسپاپتا ويناعىسى كەلەتىنىن سۇراعان ەكەن. ول باياندى تاڭداعان. ەرمەك تۋعاننان زاعيپ. نوتانى بارايل جۇيەسى ارقىلى تانىعان. ارنايى ادەبيەت جەتىسپەگەندە ەرەكشە ەستۋ قابىلەتىنىڭ ارقاسىندا اسپاپتا ويناۋدى مەڭگەرگەن.
«مۋزىكامەن اينالىسقانىما 6 جىل بولدى. بولاشاقتا مۋزىكانت بولعىم كەلەدى. ءتۇرلى كونسەرتتەرگە قاتىسقىم كەلەدى. ءبىزدىڭ ءمۇعالىمىمىز وسى ينتەرناتا وقىعان، مۋزىكالىق كوللەدجى اياقتاعان، ءقازىر بىزگە ۇيرەتىپ كەلەدى»، - دەيدى ەرمەك بايسالبەكوۆ.
قايىرىمدىلىق كەشتە وركەسترگە كونتراباس دومبىرا مەن ەكى باس دومبىرا سىيعا بەرىلدى. ال جينالعان قاراجاتقا بايان مەن ۇرمالى اسپاپتار ساتىپ الۋ جوسپارلانعان.
