Izrail prezidentiniń Qazaqstanǵa sapary bir oqiǵanyń eki túrli qabyldanatynyn kórsetken sirek jaǵdailardyń biri boldy, dep habarlaidy Dala News.
Bir jaǵynan, bul – Aqordanyń resmi, ustamdy jáne dástúrli diplomatiialyq stili. Ekinshi jaǵynan, izraildik baspasózde bul sapar áldeqaida emotsiialyq reńkte berilip, tipti «diplomatiialyq serpilis» retinde sipattalǵan.
Aqordanyń málimetinshe, Qasym-Jomart Toqaev pen Itshak Gertsog shaǵyn quramda kezdesý ótkizip, ekijaqty yntymaqtastyqtyń perspektivalaryn talqylaǵan. Memleket basshysy Qazaqstan men Izrail arasyndaǵy bailanys 1992 jyldan beri turaqty damyp kele jatqanyn atap ótip, ekonomikalyq áriptestiktiń áleýetine toqtalǵan. Sonymen qatar, bul qatynastardyń qalyptasýyna Haim Gertsogtyń da úlesi bolǵany aitylǵan. Jalpy ton – baiypty, pragmatikalyq jáne artyq geosaiasi aktsentsiz.
Al izraildik Bhol basylymy bul sapardy áldeqaida aýqymdy kontekste kórsetedi. Olardyń jazýynsha, Gertsog Qazaqstanǵa joǵary deńgeidegi sarapshylar men mamandardan quralǵan delegatsiiamen kelgen. Negizgi aktsent – joǵary tehnologiialar, innovatsiia jáne seriktestikke jańa serpin berý múmkindigi. Basylym álem «jańa tarihi kezeńge» qadam basqanyn, al Qazaqstan men Izrail arasyndaǵy yntymaqtastyq áleýeti «óte úlken» ekenin atap ótedi.
Eki taraptyń jariialanymdarynda da Avraam kelisimderi týraly aitylǵan. Aqorda dereginde Toqaev Qazaqstannyń bul kelisimderge qosylý týraly sheshim qabyldaǵanyn, bul qadam Taiaý Shyǵystaǵy turaqtylyqqa úles qosýǵa baǵyttalǵanyn aitqan. Al Bhol nusqasynda bul málimdeme keńirek interpretatsiialanyp, geosaiasi qurylymdy ózgertýge yqpal etetin strategiialyq qadam retinde sipattalǵan.
Izraildik derekkózder sapardyń eki kúnge sozylatynyn jáne onyń aiasynda tek resmi kezdesýler ǵana emes, Qazaqstandaǵy evrei qaýymdastyǵymen kezdesý de josparlanǵanyn habarlaidy. Sonymen qatar ekonomikalyq, ǵylymi jáne tehnologiialyq yntymaqtastyqty keńeitý negizgi nazarda ekeni atap ótiledi.
Jalpy, taraptardyń aktsentteri ártúrli. Qazaqstan úshin bul – ekonomika, turaqty bailanys jáne pragmatizm. Izrail úshin – simvolika, dinder dialogy jáne Taiaý Shyǵystaǵy jańa geosaiasi konfigýratsiia. Bir oqiǵa, biraq eki túrli interpretatsiia.
Sondai-aq Maariv basylymy Gertsogtyń Qazaqstanǵa Túrkiiany ainalyp ushqanyn jazǵan. Alaida bul jait Qazaqstan men Túrkiia arasyndaǵy dástúrli strategiialyq áriptestikke áser etpeitini baiqalady.
