«Elimizdegi irili-usaqty ǵimarattarda túrli kontsertter ótkizilip jatady. Onyń ishinde alys-jaqyn shetelderden de kelip, emin-erkin óz kórsetilimderin halyqqa usynyp júrgenderi az emes.
Qoiylym barysynda aýyzdaryna kelgendi aityp, anaiy tirlikterimen jastardyń sanasyn ýlap júrgenderdiń de bar ekendigin, ádepsiz is-áreketterin kózi qaraqty aǵaiyn áleýmettik jelilerge júktelgen túrli videolardan kórip júrgen bolar.
Osylardy kórip ósken urpaqtan ne kútýge bolady?
Keibir basylymdar men blogerlerdiń «uiat» degen uǵym-sózdi qunsyzdandyryp, teris is-áreketti synap, uialtpaq bolǵan adamdardy «uiatmen» atandyryp, mazaqqa ainaldyrǵan kúnge jettik.
Uialý qasietinen aiyrylǵan adam adami qasietinen de aiyrylady. Qus ilgen qýdyń uiatta isi bolmaityndyǵyna kózimiz jetip júr.
Qoǵamdaǵy keibireýlerdiń sanany ultsyzdandyrýǵa tyrysyp, urpaqty bolmysynan, dástúrli tárbie negizinen ajyratýǵa umtylýy – qaýipti úrdis. Ulttyq rýhy tómen eldiń bolashaǵy bulyńǵyr.
Óskeleń urpaqtyń ne kórip, kimdi úlgi tutyp júrgenin baqylaýsyz qaldyrýǵa áste bolmaidy!
Mysaly, memlekettiń kóptegen salalarynda qaýipsizdikti qamtamasyz etip, baqylaýǵa alatyn tehnikalyq qaýipsizdik, sanepidemstantsiia, t.t sekildi túrli qurylymdar bar.
Al qoǵamdyq sananyń qaýipsizdigin kim baqylaidy? Óz betimen sahnaǵa shyǵyp, kontsert qoiyp júrgenderdiń is-áreketteri úshin kim jaýap beredi?
Kóptegen elderde kontsert uiymdastyrýdyń protsedýralyq joldary ońai emes. San tekseristen ótýge týra keledi. Oryndalatyn shyǵarmalardyń mán-mazmuny sol eldiń memlekettik ideologiiasyna kereǵar emes pe, sahnaǵa shyǵatyn adamnyń repýtatsiiasynda kóleńkeli tustar bar ma, joq pa – bári baqylanady.
Bizde demokratiia, shyǵarmashylyq erkindik degen jeleýmen jalǵandy jalpaǵynan basyp, oiyna kelgenin jasap, aýyzyna kelgenin aityp jastardyń sanasyn ýlap júrgenderge barlyq esik ashyq bolyp tur.
Elimizde jeke tulǵalar tarapynan ótkiziletin kontserttik sharalardy baqylaýǵa alatyn kez keldi. Qoiylatyn kontsertterdiń marshrýttyq baǵytyn belgilep, ruhsat berý fýnktsiiasyn engizý qajet. Bul mindetter jergilikti atqarýshy biliktiń, mádeniet basqarmalarynyń quzyrynda bolýy kerek. Óz betimen halyqty jiyp alyp esh baqylaýsyz kontsert ótkizýge jol berýge bolmaidy.
Júzdegen adam jiylatyn jerlerdegi sharalardyń durys ótkizilý jaýapkershiligin uiymdastyrýshylar da, ruhsat berýshi mekeme de sezinetindei bolsa keshe ǵana Almatyda ótken kontserttiń ústindegi beiádep tirlikter, memlekettik týdy qorlaý faktilerine jol berilmes edi.
Árbir óner adamy is-áreketiniń, sóilegen sóziniń halyqtyń nazarynda bolatyndyǵyn eskerýi kerek. Qoǵamdyq sananyń qalyptasýynda tanymal adamdardyń aitqan áni, somdaǵan roli, sóilegen sózi qomaqty oryn alady.
Sahnaǵa shyǵatyn ár adam ózin memlekettik deńgeidegi ideolog sezinýi kerek.
Sondyqtan sahnaǵa aitary bar, halyqqa bereri barlar ǵana shyǵýy kerek!", – deidi Qanat Aitbaev.
...
Buǵan deiin 25 mamyr kúni Almaty qalasyndaǵy Balýan Sholaq saraiynda ótken kontsertte "Irina Kairatovna" toby men Shiza sahnada ersi áreketterge boi aldyryp, mikrofonǵa beiádep sózder aityp, biri memlekettik týdy halyqqa laqtyryp jibermek bolǵanyn jazǵan edik.
Bolǵan jaitqa qatysty memlekettik hatshy Erlan Qarin pikir bildirip, týdy nemese basqa da rámizderdi qorlaǵandarǵa jaýapkershilik qarastyrylǵanyn aitty.
