Iranǵa tiesili ushqyshsyz ushý apparaty (dron) Nahichevan mańyndaǵy áýejai aýmaǵyna qulaǵan. Bul týraly Ázerbaijannyń Trend jáne APA agenttikteri málimdedi, dep habarlaidy Dalanews.kz.
APA agenttiginiń málimetinshe, Iran drony Nahichevan mańyndaǵy áýejai aýmaǵyna qulaǵan. Sonymen qatar taǵy birneshe ushqyshsyz apparattyń basqa jerlerge de qulaǵany týraly aqparat taraǵan.
Ázerbaijannyń resmi vedomstvolary ázirge turǵyndar men áýejai qyzmetkerleri arasynda zardap shekkender bar-joǵy týraly málimet jariialaǵan joq. Sondai-aq dronnyń naqty túri men onyń qandai maqsatpen ushyrylǵany anyqtalyp jatyr.
Bul oqiǵa aimaqtaǵy geosaiasi jaǵdaidyń kúrt shielenisken kezeńinde boldy. Sońǵy ýaqytta Taiaý Shyǵystaǵy ahýal ýshyǵyp turǵany belgili.
Sońǵy málimetterge sáikes, Iran tarapynan aimaqtaǵy birneshe eldiń baǵytyna jappai dron ushyrý faktileri tirkelgen. Olardyń qatarynda Birikken Arab Ámirlikteri, Katar jáne Kýveit te bar.
Ázerbaijan aýmaǵyna irandyq dronnyń qulaýy – Taiaý Shyǵystaǵy sońǵy shielenis bastalǵaly beri tirkelgen alǵashqy jaǵdai.
