Interpol Qazaqstannyń sheginen tysqary shyǵarylǵan zańsyz iemdenilgen aktivterdi izdeý, tyiym salý, tárkileý jáne qaitarýǵa kómektesetin bolady. Frantsiianyń Lion qalasyndaǵy bas shtabta QR Bas prokýratýrasynyń Aktivterdi qaitarý jónindegi komiteti men INTERPOLdyń qazaqstandyq biýrosy arasynda osyndai maqsatty kózdeitin kelisimge qol qoiyldy, dep habarlaidy Dalanews.kz.
QR Bas prokýratýrasy baspasóz qyzmetiniń málimetinshe, sapar aiasynda Jahandyq aqparattyq-aǵartýshylyq qyzmet jáne óńirlik qoldaý basqarmasynyń basshysy Abdýlaziz Obaidalla myrzamen, sondai-aq Qarjylyq qylmystarǵa jáne sybailas jemqorlyqqa qarsy kúres ortalyǵynyń (IFCACC) basshysy Teos Badege myrzamen eki jaqty kezdesýler ótti.
INTERPOL ókilderimen ózekti máseleler talqylanyp, aktivterdi qaitarý salasynda tájiribe almasý úshin oqý is-sharalary men issaparlyq missiialardy uiymdastyrý, qarjylyq qylmystarǵa jáne sybailas jemqorlyqqa qarsy is-qimyl jasaýdaǵy kúsh-jigerdi nyǵaitýǵa baǵyttalǵan sharalar josparlandy.
INTERPOL Bas Hatshylyǵynyń qyzmetkerleri jańa "Kúmis habarlamamen", sondai-aq Qarjylyq qylmystarǵa jáne sybailas jemqorlyqqa qarsy kúres ortalyǵynyń (IFCACC), kriminaldyq taldaý bólimshesiniń jáne komandalyq-úilestirý ortalyǵynyń tsifrlyq jáne jedel múmkindikterimen tanystyrdy.
Taraptar INTERPOL-dyń áleýetin Qazaqstannyń sheginen tysqary shyǵarylǵan zańsyz iemdenilgen aktivterdi izdeý, tyiym salý, tárkileý jáne qaitarý úshin paidalaný týraly kelisimge keldi.
Komitet tóraǵasy Nurdáýlet Súiindikov INTERPOL Bas Hatshylyǵynyń ókilderine shaqyrý úshin alǵys bildirip, 196 memleketti biriktiretin álemdegi eń iri quqyq qorǵaý uiymymen yntymaqtastyq Qazaqstannyń aktivterdi izdeý jáne qaitarý múmkindikterin keńeitýge yqpal etetinin atap ótti.
2023 jyly Qazaqstanda zańsyz ielengen ktivterdi qaitarý týraly zań qabyldandy. Bul zań jaýapty memlekettik laýazymdardy atqaratyn nemese buǵan deiin basshylyq qyzmette bolǵan tulǵalarǵa, sondai-aq olarmen úlestes tulǵalarǵa qatysty qoldanylady. Zań normalary jalpy somasy 13 mln AEK-ten (51 mlrd teńge) astam aktivteri bolǵan jaǵdaida ǵana olarǵa qatysty qoldanylatyny da naqtylanady.
Qańtar aiynda prezident Qasym-Jomart Toqaev "Ana tili" gazetine bergen suqbatynda Qazaqstanǵa elden zańsyz shyǵarylǵan 2 trln teńgeden astam aktiv qaitarylǵanyn aitty. Bul qarajat mektepter, infraqurylymdyq mańyzdy nysandar salýǵa jáne basqa da áleýmettik mindetterdi iske asyrýǵa jumsalady.
Memleket basshysynyń zańsyz iemdenilgen aktivterdi qaitarýdan túsken qarajatty áleýmettik mindetterdi sheshýge baǵyttaý jónindegi tapsyrmasy áleýmettik infraqurylymdy jańǵyrtýdyń pármendi quralyna ainaldy.
Úkimet baspasóz qyzmetiniń habarlaýynsha,Memleket basshysynyń zańsyz iemdenilgen aktivterdi qaitarýdan túsken qarajatty áleýmettik mindetterdi sheshýge baǵyttaý jónindegi tapsyrmasy áleýmettik infraqurylymdy jańǵyrtýdyń pármendi quralyna ainaldy. Arnaýly memlekettik qordan bilim berý, densaýlyq saqtaý, sport, áleýmettik qamsyzdandyrý salalarynda 280-ge jýyq jobany júzege asyrýǵa, sondai-aq injenerlik jeliler men sý sharýashylyǵy nysandaryn jańǵyrtýǵa 194 milliard teńgeden astam qarajat aýdaryldy.
