Álemdegi eń bai adam Ilon Masktiń bailyǵy 677 mlrd dollarǵa jetti. Bul ósimge onyń SpaceX kompaniiasyndaǵy úlesiniń qymbattaýy sebep bolǵan, dep habarlaidy Dalanews.kz.
Forbes dereginshe, jeltoqsan aiynda jasalǵan tenderlik usynystan keiin Maskke tiesili SpaceX kompaniiasyndaǵy shamamen 42 paiyz úlestiń quny 336 mlrd dollarǵa baǵalanǵan. Kompaniianyń baǵasy qysqa ýaqyt ishinde eki ese ósip, tamyz aiyndaǵy 400 mlrd dollardan 800 mlrd dollarǵa deiin kóterilgen. Bul týraly Forbes-ke SpaceX-tiń eki investory málimdegen.
Forbes-tiń jazýynsha, Ilon Mask tarihta alǵash ret jeke bailyǵy 600 mlrd dollardan asqan adam atandy. Bul oqiǵa SpaceX-tiń 2026 jyly aktsiialaryn birjaǵa shyǵarýdy (IPO)josparlap otyrǵan kezeńimen tuspa-tus keldi. Investorlardyń aitýynsha, eger IPO sátti ótse, kompaniianyń jalpy quny 1,5 trln dollarǵa deiin jetýi múmkin.
Aldaǵy IPO Ilon Maskti dollarlyq trillionerge ainaldyrýy da ǵajap emes. Forbes baǵalaýynsha, Masktiń eń qymbat aktivi — dál osy SpaceX-tegi úlesi. Budan bólek, onyń Tesla kompaniiasyndaǵy 12 paiyzdyq úlesi 197 mlrd dollar dep baǵalanyp otyr. Alaida bul somaǵa 2018 jyly bas direktor retindegi erekshe eńbegi úshin berilgen aktsiia optsiondary kirmeidi. Atalǵan optsiondar 2024 jyldyń qańtarynda Delaver shtatynyń sýdiasy sheshimimen joiylǵan. Osyǵan bailanysty Forbes olardyń qunyn ýaqytsha 50 paiyzǵa qysqartyp, 69 mlrd dollar dep eseptegen. Bul sheshim Masktiń sotqa bergen apelliatsiiasy qaralǵanǵa deiin qabyldanǵan.
Sonymen qatar, qarasha aiynda Tesla aktsionerleri rekordtyq syiaqy paketin maquldady. Eger kompaniia aldaǵy on jyl ishinde naryqtyq qunyn segiz eseden astam arttyra alsa, bul paket Ilon Maskke 1 trln dollarǵa deiingi qosymsha aktsiia ákelýi múmkin.
