ەلەمدەگٸ ەڭ باي ادام يلون ماسكتٸڭ بايلىعى 677 ملرد دوللارعا جەتتٸ. بۇل ٶسٸمگە ونىڭ SpaceX كومپانيياسىنداعى ٷلەسٸنٸڭ قىمباتتاۋى سەبەپ بولعان, دەپ حابارلايدى Dalanews.kz.
Forbes دەرەگٸنشە, جەلتوقسان ايىندا جاسالعان تەندەرلٸك ۇسىنىستان كەيٸن ماسككە تيەسٸلٸ SpaceX كومپانيياسىنداعى شامامەن 42 پايىز ٷلەستٸڭ قۇنى 336 ملرد دوللارعا باعالانعان. كومپانييانىڭ باعاسى قىسقا ۋاقىت ٸشٸندە ەكٸ ەسە ٶسٸپ, تامىز ايىنداعى 400 ملرد دوللاردان 800 ملرد دوللارعا دەيٸن كٶتەرٸلگەن. بۇل تۋرالى Forbes-كە SpaceX-تٸڭ ەكٸ ينۆەستورى مەلٸمدەگەن.
Forbes-تٸڭ جازۋىنشا, يلون ماسك تاريحتا العاش رەت جەكە بايلىعى 600 ملرد دوللاردان اسقان ادام اتاندى. بۇل وقيعا SpaceX-تٸڭ 2026 جىلى اكتسييالارىن بيرجاعا شىعارۋدى (IPO)جوسپارلاپ وتىرعان كەزەڭٸمەن تۇسپا-تۇس كەلدٸ. ينۆەستورلاردىڭ ايتۋىنشا, ەگەر IPO سەتتٸ ٶتسە, كومپانييانىڭ جالپى قۇنى 1,5 ترلن دوللارعا دەيٸن جەتۋٸ مٷمكٸن.
الداعى IPO يلون ماسكتٸ دوللارلىق تريلليونەرگە اينالدىرۋى دا عاجاپ ەمەس. Forbes باعالاۋىنشا, ماسكتٸڭ ەڭ قىمبات اكتيۆٸ — دەل وسى SpaceX-تەگٸ ٷلەسٸ. بۇدان بٶلەك, ونىڭ Tesla كومپانيياسىنداعى 12 پايىزدىق ٷلەسٸ 197 ملرد دوللار دەپ باعالانىپ وتىر. الايدا بۇل سوماعا 2018 جىلى باس ديرەكتور رەتٸندەگٸ ەرەكشە ەڭبەگٸ ٷشٸن بەرٸلگەن اكتسييا وپتسيوندارى كٸرمەيدٸ. اتالعان وپتسيوندار 2024 جىلدىڭ قاڭتارىندا دەلاۆەر شتاتىنىڭ سۋدياسى شەشٸمٸمەن جويىلعان. وسىعان بايلانىستى Forbes ولاردىڭ قۇنىن ۋاقىتشا 50 پايىزعا قىسقارتىپ, 69 ملرد دوللار دەپ ەسەپتەگەن. بۇل شەشٸم ماسكتٸڭ سوتقا بەرگەن اپەللياتسيياسى قارالعانعا دەيٸن قابىلدانعان.
سونىمەن قاتار, قاراشا ايىندا Tesla اكتسيونەرلەرٸ رەكوردتىق سىياقى پاكەتٸن ماقۇلدادى. ەگەر كومپانييا الداعى ون جىل ٸشٸندە نارىقتىق قۇنىن سەگٸز ەسەدەن استام ارتتىرا السا, بۇل پاكەت يلون ماسككە 1 ترلن دوللارعا دەيٸنگٸ قوسىمشا اكتسييا ەكەلۋٸ مٷمكٸن.
