Shýhrat Ibragimov kompaniianyń baqylaý paketin ielený úshin óziniń marqum ákesi Álijan Ibragimovtyń seriktesterinen ERG-degi úlesterin satyp almaq. Kásipkerdiń osyndai jospary baryn, tipti mámile somasy týraly kúni keshe óz derek kózderine silteme jasap, Financial Times basylymy jazdy, dep habarlaidy Dalanews.kz.
Shýhrat Ibragimov ERG-diń tizginin 2024 jyldyń qazan aiynda qolǵa aldy. Basylymnyń habarlaýynsha, ol Patoh Shodiev pen jaqynda qaitys bolǵan Aleksandr Mashkevichtiń muragerlerine kompaniianyń 40% aktsiiasyn satyp alǵysy keletinin aityp, usynys jasaǵan.
Ibragimov ERG-de 2015 jyldan bastap jumys isteidi, 2021 jyly ákesi Álijan Ibragimov qaitys bolǵannan keiin direktorlar keńesi quramyna da endi.
ERG-dyń negizin 1994 jyly Álijan Ibragimov, Aleksandr Mashkevich jáne Patoh Shodiev qalaǵan bolatyn. Úsh otbasynyń árqaisysy shamamen 20% aktsiiadan enshilegen, al qalǵan 40%-y Qazaqstan úkimetine tiesili.
2024 jyly kompaniianyń negizin qalaýshylar óz quqyqtaryn muragerlerge berý protsesin bastady. Aldymen Shodiev kompaniia tizginin uly - Sabyrǵa berdi, Mashkevichtiń ornyna onyń jieni Edýard Sýrlevich keldi. FT málimetinshe, sol kezde aktsiialardy satý týraly kelissózder bastalǵan, biraq olar 2024 jyldyń naýryzynda Aleksandr Mashkevich dúnie salǵannan keiin jandana tústi.
Basylymnyń derekkózderi Shodiev pen Mashkevichtiń otbasylary óz úlesterin satýǵa daiyn ekendikterin aitqan, biraq kompaniia qunyn baǵalaý jaǵy daýly máselege ainalǵan. Olar ózderiniń aktsiialary úshin 1,8 milliard dollarǵa deiin aqy surapty, biraq Ibragimov odan az soma usynǵan.
Sondai-aq, taraptar Ibragimovtyń basqa birlesken aktivterdegi (Eýraziialyq bank jáne "Eýraziia" saqtandyrý kompaniiasy) úlesin mámile somasynyń bir bóligi boiynsha qosymsha qolma-qol aqshamen esepaiyrysý túrinde aiyrbastaý múmkindigin talqylaýda.
ERG qupiia qaldyrýdy jón kórip, kelissózder barysyna qatysty túsinikteme berýden bas tartqan. Ibragimov, Shodiev jáne Sýrlevich ókilderi de FT joldaǵan saýaldarǵa jaýap bermepti. Basylymnyń habarlaýynsha, Qazaqstan Úkimeti ERG-diń uzaq merzimdi jáne turaqty negizgi aktsioneriniń bolǵanyna múddeli, bul Ibragimovtyń áreketterin qoldaýdy bildirýi múmkin.
21 sáýirde Reuters halyqaralyq agenttigi amerikalyq kásipker Djeims Kemeron Eurasian Resources Group-ty 5 milliard dollarǵa satyp alǵysy keletinin habarlady. Basylymnyń málimetinshe, investor ERG Direktorlar keńesine kelissóz júrgizý úshin usynys hat joldaǵan. Reuters taraptar arasyndaǵy kelissózder 2024 jyldyń aiaǵynan bastap júrgizilip jatqanyn habarlady. Keiinirek Shýhrat Ibragimov kompaniiany satý týraly atalǵan qaýesetti joqqa shyǵardy. Ol "eshqandai kelissózder júrgizilip jatpaǵan", al BAQ-taǵy aqparattar alyp-qashpa sózder ekenin naqtylady. Naýryz aiynyń ortasynda Bloomberg Shodiev pen Mashkevichtiń otbasylary bank, saqtandyrý kompaniiasy jáne brokerlik kompaniiadan turatyn "Eýraziialyq qarjy kompaniiasyndaǵy" úlesterin satqysy keletinin habarlady, biraq Ibragimov buǵan qarsy kórinedi.
Ol kompaniianyń direktorlar keńesiniń táýelsiz direktoryn sailaý týraly josparlanǵan sharanyń kúshin joiýdy surap, sotqa júgindi.
ERG Liýksembýrgte tirkelgen jáne tabiǵi resýrstardy óndirý jáne óńdeý salasyndaǵy iri kásiporyndardyń basyn biriktiredi: Qazaqstandaǵy ferroqorytpa, temir keni, aliýminii, kómir jáne energetikalyq aktivter. Sonymen qatar, ERG Afrikadaǵy mys-kobalt jobalaryna ege jáne Braziliiada temir rýdasyn óndirý jobasyn júzege asyrady.
Qazaqstanda oǵan "Qazhrom", "Qazaqstan aliýminiii", SSKÓB, Qazaqstandyq elektroliz zaýyty, "Eýroaziialyq energetikalyq korporatsiia", "Shubarkól kómir", "TransKom" kólik toby jáne basqa da kásiporyndar tiesili.
Aita ketsek, ERG-dyń moinynda 4 mlrd dollar qaryz bar, onyń ústine kompaniianyń sońǵy eki jylda shyǵyndary artýda.
