Hromtaý aýdandyq sotynda Hromtaý qalasynyń ákimi Saǵyndyq Shabyqbaev pen Nurbek Kazbekke qatysty qylmystyq is qaraldy. Ákimge para alǵany úshin aiyp taǵylsa, Nurbek Kazbek paraqorlyqqa deldal bolǵan jáne kúsh qoldanamyn dep qorqytyp, aqsha talap etken dep tanyldy, dep habarlaidy Dalanews.kz.
Tergeý derekterine sáikes, biyl kúzde jergilikti kásipker Nurbek Kazbekke júginip, qala aýmaǵyn abattandyrý boiynsha atqarylǵan jumystardyń aktilerin jedel bekitýge kómektesýdi suraǵan. Atalǵan jumystardyń jalpy quny 27 mln teńgeni quraǵan.
Kazbek kásipkerge bul máseleni sheshý úshin qala ákimine 400 myń teńge kóleminde para berý qajet ekenin aitqan. Sonymen qatar ol ózine qosymsha 1,1 mln teńge talap etip, qarjy bermegen jaǵdaida kúsh qoldanamyn dep qorqytqan.
Kásipker aqshany birneshe bólip tólegen: 400 myń, 200 myń jáne 100 myń teńge. Osydan keiin Nurbek Kazbek pen Saǵyndyq Shabyqbaev ustalyp, eki aiǵa qamaýǵa alyndy.
Sot barysynda aiyptalýshylar kinálaryn moiyndap, jasaǵan áreketterine ókinish bildirip, jábirlenýshiden keshirim suraǵan. Sot olardyń kámeletke tolmaǵan balalary baryn, qylmystyń ashylýyna yqpal etkenin jáne shyn ókingenin jeńildetetin mán-jailar retinde esepke aldy.
Nátijesinde Hromtaý aýdandyq soty Saǵyndyq Shabyqbaev pen Nurbek Kazbekti kináli dep tanyp, árqaisysyna 12 mln teńge kóleminde aiyppul saldy. Sondai-aq olarǵa memlekettik qyzmet atqarý quqyǵynan ómir boiyna aiyrý jazasy taǵaiyndaldy. Al Nurbek Kazbekke qatysty «Qarajatty kúsh qoldanyp talap etý» baby boiynsha is jábirlenýshimen tatýlasýyna bailanysty toqtatyldy.
Qazirgi ýaqytta sot úkimi zańdy kúshine engen joq.
Aita keteiik, Saǵyndyq Shabyqbaev sońǵy eki jyl boiy Hromtaý qalasynyń ákimi qyzmetin atqarǵan. Ol bul laýazymǵa ózin-ózi usynǵan kandidat retinde sailaýda jeńiske jetken edi.
