Mańǵystaý oblysynda Kaspii teńizindegi áskeri oqý-jattyǵý kezinde qaza tapqan sarbazdardyń otbasylaryna qarjylai kómek jinala bastady. Alaida bul bastama áleýmettik jelide synǵa ushyrady. Keibir azamattar áskeri mindetin atqarý kezinde qaza tapqan sarbazdardyń otbasyna memleket kómektesýge tiis ekenin aityp, qarajattyń halyqtan jinalýyna qarsylyq bildirdi, dep habarlaidy dalanews.kz.
Jýrnalist Bibigúl Ramazan kómek jinaýǵa "Ulttyq rýh" qoǵamdyq birlestiginiń tańdalýyna kúmán keltirdi.
"Mańǵystaý oblysynyń ákimdigi Lada saityna osyndai maqala shyǵarypty! “Ulttyq rýh” degen qoǵamdyq qorǵa aqsha jinap jatyrmyz depti! Masqara kimniń qory? Ne qor bul? Sonda bul sarbazdardyń aqshasyn da halyqtan jinap bergisi kelip tur ma bilik? Halyq óz qotyryn ózi qasyp júr! Endi úkimet beretin aqshany da biz jinap berýimiz kerek pe?", – dep jazdy ol.
Avtor Mańǵystaý oblysynyń ákimi Nurdáýlet Qilybaidan da túsinikteme berýdi surady.
"Nurdáýlet myrza pikir berińiz! Mynaý qai sasqanyńyz halyqtan jylý jinap! Halyq Keńesi 815 mln jinady dep tur! Endi halyqtan taǵy jinaisyń ba?", – delingen jazbada.
Jeli qoldanýshylary "Ulttyq rýh" qoǵamdyq birlestigi týraly naqty aqparattyń az ekenin de synǵa aldy. Olar qordy kim basqaratynyn, onyń ne sebepti biryńǵai operator retinde tańdalǵanyn jáne jinalǵan qarajattyń qalai jumsalatynyn ashyq túsindirýdi talap etti.
"Ulttyq qor degen kim? Basshysy: Súgirbai Aiat degen keshe Quryltaida sailanǵan depýtat eken. Nege biz depýtattyń schetyna aqsha salýymyz kerek eken?" – dep jazdy jeli qoldanýshylarynyń biri.
Jeli qoldanýshylary qaza tapqan sarbazdardyń otbasylaryna kómek kórsetýge qarsy emes ekenin atap ótti. Olardyń aitýynsha, áskeri mindetin atqarý kezinde qaza tapqan sarbazdardyń otbasyn eń aldymen memleket qamtamasyz etýge tiis.
