Atalmysh másele talqylanǵan kezdesý 2020 jyldyń 2 aqpanynda Er-Rıad qalasynda ótti. Dáýren Abaev Qazaqstan Saýd Arabıasynyń búkil álemde Islamnyń rólin nyǵaıtýǵa, dinniń shynaıy, beıbitshilikti súıgish mánin nasıhattaýǵa baǵyttalǵan kúsh-jigerin joǵary baǵalaıtynyn atap ótti.
– Biz Saýd Arabıasynyń búgin de radıkaldy ekstremızm men terorızmge qarsy ymyrasyz kúres júrgizip jatqanynan habardarmyz. Qazaqstan árqashan terorızmniń barlyq formasy men kórinisterinde aıyptap keledi. Sonymen birge halyqaralyq qaýymdastyqtyń osy qubylysty joıý úshin tıimdi ujymdyq kúsh-jigerdiń jumsalýyn qoldaıdy, – dep sendirdi mınıstr.
Sheıh Ábdel Latıf ál-SHeıh Saýd Arabıasy Koróldigi men Qazaqstan Respýblıkasy arasyndaǵy baýyrlastyq qatynastardyń tereńdigi men beriktigin erekshe atap ótip, Koróldiktiń Islam dini keń taralǵan elderdegi baýyrlastarymen qarym-qatynasty joǵary baǵalaıtynyn atap ótti.
– Meıirimdi ári ádiletti ımam Salman bın Ábdel Ázız Ál Saýd jáne onyń murageri – mártebeli hanzadanyń basshylyǵyndaǵy Koróldik búkil álemdegi musylmandardyń múddelerin eskerip, ıslamy dushpandary bolyp tabylatyn ekstremıster men terrorısterdiń zıandy áserinen qorǵaý úshin qoldan kelgenniń bárin jasaıdy, – dedi sheıh.
Taraptar rýhanı jáne dinı saladaǵy ekijaqty yntymaqtastyqty damytý joldary týraly jáne Islamnyń qazirgi jaǵdaıynyń ózekti máseleleri boıynsha pikir almasty. Kezdesý qorytyndysy boıynsha mınıstrler radıkaldy dinı aǵymdardyń aldyn-alý jóninde, atap aıtqanda, halyqty ekstremıstik dinı ıdeologıanyń áserinen qorǵaý boıynsha nasıhat jumystary arqyly tájirıbe men aqparat almasýǵa kelisti.
