Qasym-Jomart Toqaev halyqaralyq jaǵdaı qubylyp turǵan kezde ınvestısıalyq turaqtylyq pen boljamdylyqty qamtamasyz etýge qabiletti senimdi qarjy kózderin izdeý ózekti bolatynyn aıtty. «Astana» halyqaralyq qarjy ortalyǵy Qazaqstan men búkil Ortalyq Azıa aımaǵy úshin osyndaı mindetti atqaratyn mekemelerdiń biri sanalady.
– Qazaqstan naryqtyq, erkin ári básekeli ekonomıkany qarqyndy ilgeriletýge baǵyttalǵan damýdyń jańa kezeńine qadam basýda. Mundaı jaǵdaıda sheteldik ınvestorlar men saýda seriktesteriniń senimin saqtap qalý jáne nyǵaıtý bizdiń basty basymdyǵymyz bolary sózsiz. Osyǵan baılanysty AHQO-nyń áleýeti ınvestısıalardyń senimdiligi men qaýipsizdiginiń kepili retinde barynsha paıdalanylýǵa tıis, – dedi Prezıdent.
Memleket basshysy ulttyq kompanıalardy IPO-ǵa shyǵarý jumystaryn kelesi mańyzdy mindet retinde atady. «Samuryq-Qazyna» AQ-y men onyń ulttyq kompanıalarynyń rólin mysalǵa keltirdi.
– Elimizdiń qarapaıym azamattary Ulttyq kompanıalardyń aksıalaryn ıelenýge jáne salymdarynan óz dıvıdentterin alýǵa múmkindigi bolýǵa tıis. Dál osyndaı jolmen halyqtyń ınvestısıalyq mádenıeti qalyptasady. IPO-ǵa qatysý Qazaqstannyń barlyq turǵyny úshin qoljetimdi bolýy qajet. Ol úshin qaǵazbastylyq pen búrokratıany boldyrmaıtyn jańa sıfrlyq sheshimder kerek, – dedi Memleket basshysy.
Qasym-Jomart Toqaev uzaq merzimdi sheteldik ınvestorlardy teńge túrindegi táýelsiz oblıgasıalarǵa tartýdyń ózektiligin atap ótti.
– Elimizge jańa ári senimdi ınvestısıa kózderi qajet. Ol úshin halyqaralyq depozıtarıılermen ózara tyǵyz yqpaldastyq ornatý kerek. Mundaı jaǵdaıda retteýshilik rejım men halyqaralyq quqyqqa negizdelgen AHQO alańy tartymdy bolady. Úkimetke Ulttyq bankpen jáne AHQO-men birlese otyryp, uzaq merzimdi ınstıtýsıonaldyq ınvestorlary bar álemdik ınfraqurylymǵa qosylý máselesin pysyqtaýdy tapsyramyn. Bul ekonomıkamyzdyń ornyqty ósimi úshin mańyzdy qadam bolmaq, – dedi Prezıdent.
Memleket basshysy ornyqty damý maqsattaryna qol jetkizý jáne «jasyl» jobalardy júzege asyrý máselesine toqtaldy. Onyń aıtýynsha, byltyr ornyqty qarjylandyrý naryǵynyń kólemi 500 ese ulǵaıyp, 250 mıllıon dollardan asty. Onyń ishinde jasyl oblıgasıalar men nesıelerdiń 58 paıyzyn AHQO Jasyl qarjy ortalyǵy naqtylady.
– Bul ekonomıkany kómirteginen aryltý jáne kómirtegin az paıdalaný tehnologıalaryn damytý jónindegi jahandyq mindetterdi elimizdiń sátti sheshýge qabiletti ekenin dáleldeýine yqpal etedi. Úkimetti, «Astana» halyqaralyq qarjy ortalyǵyn jáne Keńes múshelerin osy baǵyttaǵy jumystyń qarqynyn báseńdetpeı, jalǵastyra berýge shaqyramyn, – dedi Prezıdent.
Qasym-Jomart Toqaev energıa tasymaldaýshy jahandyq naryqtardyń jáne álemdik azyq-túlik ortalyqtarynyń transformasıalanýy kezinde Qazaqstannyń rólin kúsheıtý mańyzdy ekenine nazar aýdardy.
– Qazaqstan úshin senimdi ári básekege qabiletti ınfraqurylymy bar bırja naryǵy jóninde málimdeý óte mańyzdy. Bul aımaqtyq jáne jahandyq saýdada kóshbasshylyqqa ıe bolý úshin jańa múmkindikterge jol ashady. Úkimet osy máseleni jan-jaqty pysyqtaýy kerek, – dedi Prezıdent.
Memleket basshysy krıptoındýstrıa jáne sıfrlyq aktıvterdi damytý máselelerine de toqtaldy.
– Biz áleýetimizdi barynsha tıimdi paıdalanýymyz kerek. Elimiz krıptoaktıvterdi shyǵarý boıynsha ekinshi orynda tur. Alaıda biz tek qana shıkizat mártebesin ustanyp qalmaýymyz kerek. Osy oraıda, Úkimet qarjy retteýshilerimen jáne «Astana» halyqaralyq qarjy ortalyǵymen birlese otyryp, keshendi sıfrlyq ekojúıeni damytý úshin qolaıly jaǵdaı jasaýy qajet, – dedi Qasym-Jomart Toqaev.
Memleket basshysy jıyndy qorytyndylaı kele, AHQO-nyń 2021 jyly atqarǵan jumysynyń jyldyq esebin bekitti.
