Kúnniń sýyqtyǵy men qýańshylyq Aýǵanstandaǵy azyq-túlik daǵdarysyn odan saiyn tereńdete túsedi, – dep eskertti BUU sarapshylary Bi-bi-si telearnasyna.
"Aýǵan halqynyń toqsan bes paiyzy tamaq tappai otyr, al biz ashyqqan jurttyń ajalǵa qarai bet alǵanyn baqylap qana otyrmyz. Aldaǵy alty ai Aýǵanstan úshin Jerdegi tozaqqa ainalady", – dedi Dúniejúzilik azyq-túlik baǵdarlamasynyń atqarýshy direktory Devid Bisli. Ol jaqynda ǵana Kabýldan oraldy.
Biyl tamyzda batys elderi Aýǵanstanǵa azyq-túlik pen dári-dármek berýin toqtatty, óitkeni olar "Taliban" qozǵalysymen bailanys ornatqysy kelmeidi.
Kabýldan 50 shaqyrym jerdegi Vardak provintsiiasynda birneshe júz adam un kezeginde tur. BUU Dúniejúzilik azyq-túlik baǵdarlamasy usynǵan kómekten un ǵana qalǵan.
"Qys jaqyndap qaldy. Nan pisiretin eshteńe bolmasa, qystan qalai shyǵarymyzdy bilmeimin", – deidi kezekte turǵan qart.
Turǵyndardyń keibiri aqsha tabý úshin qyzdaryn satqan.
Devid Bisli halyqaralyq qaýymdastyqty beikúná adamdardyń qyrylýyna jol bermeýge úndedi. "Biz balalardyń ashtyqtan qyrylýyna jol berdik. Masqara. Ol balalardyń qai elde turatynyna mán bermeýimiz kerek", - deidi Bisli.
Biyl tamyzda "Taliban" qozǵalysynyń sodyrlary eldegi bilikti basyp aldy. Bunyń aldynda halyqaralyq kúshter Aýǵanstannan shyǵarylǵan. Bilikke jetken tálipter qyzdardyń bilim alýyn toqtatyp, urlyq jasaǵandardyń qol-aiaǵyn kesýdi, halyq aldynda ólim jazasyn oryndaýdy qaita jańartty. Tálipter úkimetin álemdegi eshbir memleket resmi túrde moiyndaǵan joq.
