Olar depýtattyq saýalyn premer-ministr Asqar Maminge joldady.
Tótenshe jaǵdai rejimi, karantin men lokdaýn siiaqty shekteý sharalary aýrýdyń jappai taralýyn toqtatýǵa kómektesken sheshimder boldy. Biraq bul sharalar jaldamaly jumysshylar men kásipkerlerdi tabysynan aiyrdy, - dedi depýtat Aiqyn Końyrov.
Onyń sózinshe, karantin kezeńinde ShOB salasynda óndiris kólemi kúrt qulady, qoǵamdyq tamaqtaný óndirisi - 53%-ǵa, bólshek saýda - 45%-ǵa, kólik - 37%-ǵa quldyrady. Budan kásipkerler men jumysshylar úshin kásiporyndardyń jabylýy, bankrot, banktermen sottasý siiaqty táýekelder týyndaidy.
Karantin kezinde resmi derekterge sai, 4 mln 200 myń adam jumyssyz qaldy. Jumyssyzdyq el tarihynda bolmaǵan 46%-ǵa deiin jetken. Bul daǵdarys – sanitarlyq-epidemiialyq jaǵdaidan ǵana emes, jumysyzdyq jaǵdaiynan da týyndaǵan daǵdarys. Sáikesinshe, endi tótenshe sharalar qabyldaý qajet, - dedi májilis depýtaty.
Ol el Prezidentiniń 2019-shy jylǵy "nesielik raqymshylyǵy" qoǵam men qarjy institýttaryna oń áserin berdi deidi. Biraq 2020 jyldyń alǵashqy jartysynda mikrokreditter kólemi aitarlyqtai ósip ketken. Shaǵyn jáne orta biznes mikrokredittik portfelin 850% paiyzǵa ósirip aldy, sonymen birge merzimi ótip ketken qaryzdar da 238%-ǵa ósti.
Eger buryn halyq nesieni turmystyq tehnika, kiim-keshek pen toi-tomalaqqa alsa, endi burynǵy kreditterin jabý úshin, balalaryn oqytý, emdelý men tamaq jeý úshin jańa kreditter alyp jatyr.
Nesie tólemderin shegeretin prezidenttik moratorii osy qyrkúiek aiynda aiaqtalady, al nesie alǵandardyń tólem qabilettigin qalpyna keltire alýy ekitalai.
Mamandar eger jańa shekteý sharalary engizilmese, shaǵyn jáne orta biznes burynǵy qalpyna tek bir jyldan keiin ǵana keledi dep boljap otyr. Túrli sarapshylar ShOB nysandarynyń 30%-dan 50%-yna deiin jabylady deidi. Soǵan bailanysty azamattar men shaǵyn biznesti qoldaý qajet, dedi Qońyrov.
Ol jeke jáne zańdy tulǵalar úshin keń aýqymdy nesielik raqymshylyq júrgizýdi usyndy.
