Nur-Sultan qalalyq Qoǵamdyq densaýlyq saqtaý basqarmasynda skriningtik tekserýden ýaqytyly ótýdiń mańyzdylyǵyn atap ótti.
– Ókinishke qarai, adamdar densaýlyǵyn tek aýyrǵan kezde ǵana baǵalaidy. Óz densaýlyǵyn kútpeýdiń saldarynan túrli aýrýlarmen aýyrady. Dárigerler ýaqytyly qoiylǵan dignoz insýlt, infarkt, qaterli isikter men infektsiialyq aýrýlardyń aldyn alýǵa bolatynyn aitady, – dedi qalalyq ákimdikte ótken brifingte Qoǵamdyq densaýlyq saqtaý basqarmasy basshysynyń orynbasary Áliia Rústemova.
Onyń aitýynsha, 40-70 jas aralyǵyndaǵy áiel adamdarda sút beziniń isigi jii baiqalady, sondyqtan olar eki jylda bir ret skriningten ótý kerek.
– 30 jastan 70 jasqa deiingi tulǵalar eki jylda bir ret arterialdy gipertoniia, qant diabeti, glaýkoma, onkopatologiia, júrek aýrýlaryn erteń kezeńnen anyqtaý úshin emhanaǵa júginedi, – dedi bilikti maman.
Jalpy, Qazaqstanda halyqty skriningten ótkizý jumysy bastalǵanyna 10 jyldan asty. Búgingi memlekettiń esebinen tegin profilaktikalyq tekserýden ótýge bolady. «Sońǵy jyldary áielder arasynda jii taralǵan aýrýlardyń qataryna sút beziniń obyry men jatyr moinynyń obyry jatady. Er adamdarda kezdesetin onkologiialyq aýrý túrlerine ókpe obyry, qýyqasty beziniń obyry kiredi. Kóp jaǵdaida naýqastar dertti asqyndyryp, meditsinalyq kómekke kesh júginedi. Sondyqtan da ýaqtyly skriningtik tekserýden ótý arqyly bul olqylyqtyń ornyn toltyrýǵa bolady», - dep Rústemova oiyn ortaǵa saldy.
Skriningtik tekserý qyzmetteri 2020 jyldan bastap MÁMS paketiniń quramyna kiredi. Mundai jaǵdaida eresekter men balalar profilaktikalyq tekserýden tek saqtandyrylǵan jaǵdaida ǵana óte alady. Alaida memleket balalar úshin tóleitin bolady, al eresekter jeńildik tobyna jatpaityn bolsa ai saiyn Meditsinalyq saqtandyrý qoryna tólem tóleý kerek bolady. MÁMS júiesiniń memleket pen adamdar arasyndaǵy ortaq jaýapkershilikke negizdeletin bailanysty nyǵaitýda kómegi zor. Mindetti áleýmettik meditsinalyq saqtandyrý júiesi arqyly adamdarǵa tańdaý múmkindigi, qymbat meditsinalyq qyzmet túrleri qoljetimdi bolady.
