«Halyq qatysatyn búdjet» baǵdarlamasy aıasynda 3 shaqyrym aleıa abattandyryldy.
Almatyda Turǵut Ózal kóshesinen Muqanov kóshesine deıin uzyndyǵy 2,6 km, jalpy aýmaǵy 5,2 gektar bolatyn bólingen jolaqta abattandyrý jumystary aıaqtaldy.
Almaty ákimdiginen málim etkendeı, atalǵan aımaqta jóndeý jumystary 15 jyl buryn júrgizilgen. Aleıany jańǵyrtý barysynda sapaly materıaldar qoldanyldy.Jol men jaıaý júrginshilerge arnalǵan aımaqtardy jaıly etý maqsatynda yńǵaıly oryndyqtar, fýnksıonaldy shamdar jáne berik jabyn tóseldi.
Sáýletshi Vladıslav Fılatov azamattardyń «Halyq qatysatyn búdjet» jobasyna atsalysýy sapaly qalalyq ortany qalyptastyrýǵa yqpal etetinin jetkizdi.
«Árqaısymyz «Halyq qatysatyn búdjet» baǵdarlamasyna qatysý týraly oılanýymyz kerek.Bul qalany kórkeıtýge úles qosýdyń tamasha múmkindigi. Osyndaı jobalardyń arqasynda turǵyndardyń ıdeıasy shyndyqqa aınalyp jatqanyn kórip otyrmyz», – deıdi ol.
Abattandyrý aıasynda 7810 sharshy metr jańa kespe tas tóselip, 4882 metr jıektas ornatyldy, bul aleıanyń kórkin keltirip, jaıaý júrginshiler úshin yńǵaıly etti. Uzyndyǵy 10 800 metr bolatyn sý qubyry jasyl jelekti sýarýǵa arnalǵan. 21 000 sharshy metr aýmaqta kógal egilip, 2500 buta otyrǵyzyldy, 110 qoqys jáshigi jáne 150 jaryqtandyrý baǵanasy ornatyldy,bul qaýipsizdik pen jaılylyqty arttyrady.
Osylaısha, kóriktendirý jumystarynyń nátıjesinde jańartylǵan aleıa qalanyń fýnksıonaldy jáne estetıkalyq bóligine aınaldy.
