Alaiaqtyq pen jalǵan aqparat taratty dep kúdikke ilingen 23 jastaǵy astanalyq turǵyn ustaldy, dep habarlaidy Dalanews.kz.
23 aqpanda Threads áleýmettik jelisinde belgisiz akkaýnt arqyly bir jeli qoldanýshysy áskerde júrgeninde jynystyq zorlyq-zombylyqqa ushyraǵanyn jáne qazirgi ýaqytta qýdalaýdan qorqatynyn málimdegen. Ol bir jyl buryn áskerden oralǵanyn, biraq bolǵan sumdyq oqiǵany áli de umyta almai júrgenin jazǵan.
Post avtorynyń sózinshe, komandiri ony qorqytyp, jynystyq sipattaǵy áreketterge májbúrlegen. Jazbada jeli qoldanýshylarynyń nazaryn aýdaratyndai egjei-tegjeili málimetter keltirilgen. Oqiǵanyń "qorqynyshty" tustaryn baiandai otyryp, ol ózine qarjylai kómek suraǵan, qaýip baryn alǵa tartyp, shetelge ketý qajettigin jetkizgen. Jariialanymda bank rekvizitteri qosa kórsetilgen. Jinalǵan qarajatty shetelge shyǵý úshin jumsaitynyn málimdegen. Sonymen qatar ol osy jaǵdaidan keiin depressiiaǵa túskenin jáne burynǵydai qyzymen qarym-qatynasyn jalǵastyra almaitynyn jazǵan.
Alaida shotty tekserý úshin politsiiaǵa júgingen bir jeli qoldanýshysynyń qyraǵylyǵynyń arqasynda jazba avtorynyń jalǵan áreketteri áshkerelendi. Jedel qyzmetkerlerge tek rekvizitter ǵana emes, oqiǵanyń ózi de kúmándi kóringen. Barlyq kúdik esepshot iesi - 17 jastaǵy jasóspirim ekeni anyqtalǵannan keiin rastaldy. Onyń aitýynsha, hostelde tanysqan burynǵy tanysy oǵan qaryzyn aýdarý úshin rekvizitterin suraǵan. Sondai-aq óz esepshottary buǵattalǵanyn aityp, basqa aýdarymdardy qabyldaýyn ótingen.
Bul zańsyz áreketke sengen jasóspirim jeke derekterin berýge kelisken. Eki kúnniń ishinde onyń esepshotyna 100-den astam aýdarym túsken. Júrgizilgen jedel-izdestirý sharalary barysynda post avtory ustaldy. Jariialanǵan aqparat shyndyqqa sáikes kelmeidi. Sonymen qatar onyń áskeri qyzmetke esh qatysy joq ekendigi jáne áskerde eshqashan bolmaǵany belgili boldy. Óziniń osy áreketimen ol áskeri qyzmettiń bedeline nuqsan keltirdi. 23 jastaǵy kúdiktiniń aitýynsha, jalǵan aqparatty ol aqsha jinaý maqsatynda jariialaǵan.
Kórineý jalǵan aqparatty taratý jáne alaiaqtyq faktileri boiynsha qylmystyq ister qozǵaldy. Sotqa deiingi tergep-tekserý júrgizilýde, kúdikti ustalyp, ýaqytsha ustaý izoliatoryna qamaldy. Sot sanktsiiasymen ol qamaýǵa alyndy. Osyndai ailasy úshin jigitke birneshe jylǵa deiin bas bostandyǵynan aiyrý jazasy qarastyrylady.
