Qazaqstannyń túkpir-túkpirinen 550-den astam kolledj stýdenti qatysqan WorldSkills Kazakhstan kásibi sheberlik boiynsha respýblikalyq chempionaty óz máresine jetti. Úsh kún boiy jas mamandar úzdikter qatarynan kóriný úshin baq synasty, dep habarlaidy Dalanews.kz.
Prezident jariialaǵan "Jumysshy mamandyqtary jyly" aiasynda bul sharanyń mańyzy arta tústi. Chempionattyń finalisterimen kezdesken premer-ministr Oljas Bektenov olardyń alǵan bilimderiniń búgingi tańda asa qajet ekenin atap ótti. Ol tsifrlyq transformatsiia men tehnologiialyq progress týdyrǵan syn-qaterlerge daiyn bolýdyń mańyzyna erekshe toqtaldy.
Qatysýshylar óz sheberlikterin kórsetken 30 baǵyttyń qatarynda dástúrli mamandyqtarmen birge zamanaýi salalar da qamtyldy. Elektromontaj, energetika, kirpish qalaý, avtokólik jóndeý, aspazdyq jáne meiramhana isimen qatar, mehatronika, injenerlik grafika, veb-tehnologiialar, biznestegi IT-sheshimder, mobildi robototehnika, mobildi qosymshalardy ázirleý jáne prototipteý syndy jańa baǵyttar da nazardan tys qalmady.
"Jelilik jáne júielik ákimshilik" baǵyty boiynsha birinshi oryndy Qostanai avtomobil kóligi kolledjiniń túlegi Gleb Saýlenko ielendi. Ol qazirgi ýaqytta Qostanaidaǵy Allur avtozaýytynda júielik ákimshi bolyp jumys isteitin suranysqa ie jas maman.
"Chempionatta bizge kúrdeli tapsyrmalar berildi: qurylǵylardy negizgi baptaýdy júrgizý, kommýtatsiia men marshrýtizatsiiany túsinýdi kórsetý, jelilik qyzmetterdi ornatý qajet boldy. Buǵan deiin men oblystyq deńgeidegi osy jarystarǵa qatysyp, ekinshi oryn alǵan edim. Bul jerde basqa jas mamandarmen tanysyp, tájiribe jáne ideia almasý qyzyqty boldy", – deidi Gleb.
Jumysshy mamandyqtaryna degen suranys jumys berýshiler tarapynan artyp keledi. Osy tusta, Allur kompaniiasy bilim berý jobalaryn belsendi júzege asyrýda. Atap aitqanda, 2021 jyldan beri Qostanai avtomobil kóligi kolledjimen seriktestik ornatqan. Bul yntymaqtastyqtyń arqasynda stýdentter oqý protsesinen ajyramai-aq praktikalyq daǵdylardy meńgeredi. Oqyp júrgende zaýytta tájiribeden ótip, oqý aiaqtalǵan soń turaqty jumysqa ornalasady.
Bolashaq mamandardy básekege qabiletti jalaqy, mansapta ósý múmkindigi, tolyq áleýmettik paket, jumysqa tasymaldaý jáne tegin tamaqtaný siiaqty artyqshylyqtar kútip tur. Sonymen qatar zaýyt zamanaýi jataqhana salyp jatyr, bul jas qyzmetkerler úshin qosymsha jaǵdai jasamaq.
