Máskeý oblysy Ýkraina qarýly kúshteriniń kezekti jappai dron shabýylyna ushyrady. Astra Telegram arnasynyń habarlaýynsha, shabýyldan keiin Podolsk qalasyndaǵy Koledino aýdanynda ornalasqan 3PL logistikalyq kompaniiasynyń qoimasynda órt shyqqan, dep habarlaidy dalanews.kz.
OSINT-taldaý negizinde jariialanǵan beinejazbalarda oqiǵa ornynan qoiý qara tútin kóterilgeni baiqalady. 3PL kompaniiasy taýarlardy qabyldaý, saqtaý, tapsyrystardy jinaqtaý, oraý jáne jetkizýmen ainalysady.
Eń bastysy, órt shyqqan qoimanyń dál janynda Wildberries marketpleisiniń iri logistikalyq ortalyǵy ornalasqan. Osyǵan bailanysty áleýmettik jelilerde Wildberries qoimasyna zaqym kelgeni týraly aqparat tarady.
Alaida Wildberries kompaniiasynyń baspasóz qyzmeti bul málimetti joqqa shyǵardy. Kompaniianyń habarlaýynsha, Koledinodaǵy logistikalyq keshen qalypty rejimde jumys istep tur, ǵimaratqa zaqym kelmegen jáne taýarlardy qabyldaý men jóneltý jumystary kestege sai jalǵasýda. Muny rastaý úshin kompaniia qoimadaǵy qalypty jumysty kórsetetin beinejazbany jariialady.
Al Máskeý meri Sergei Sobianinniń málimetinshe, Máskeý óńirine qarai barlyǵy 390 ushqyshsyz ushý apparaty baǵyttalǵan. Onyń ishinde Máskeýge jaqyndaǵan 81 dron áýe qorǵanys kúshteri tarapynan joiylǵan. Sonymen qatar Chehov qalasyndaǵy turǵyn úige dron tiip, birneshe páter zaqymdanǵanymen, zardap shekkender tirkelmegen.
