Sultan Sársemálievke qatysty sot otyrysynda jábirlenýshiler otbasy músheleri joǵalǵannan keiin de týystaryna olardyń telefondary arqyly habarlamalar men aýdiojazbalar kelip turǵanyn aitty. Osylaisha marqumdar áli tiri júrgendei áser qalyptastyrylǵan, dep habarlaidy dalanews.kz.
Atyraý oblysynyń qylmystyq ister jónindegi mamandandyrylǵan aýdanaralyq sotynda tústen keiin marqum Násip Óteshqalievanyń týǵan aǵasy Tilekqabyl Óteshqalievten jaýap alyndy. Ol sotqa Isatai aýdanynan kelgen.
Onyń aitýynsha, ótken jyldyń 7 qarashasynda otbasylyq WhatsApp tobyna qaryndasynyń nómirinen aýdiohabarlama túsken. Onda týystardyń jaǵdaiy, densaýlyǵy jáne kúndelikti tirshiligi týraly ádettegi suraqtar qoiylǵan.
“Bul onyń kózi tirisinde jazylǵan eski aýdio bolýy múmkin”, – dedi jábirlenýshi sotta.
Buǵan deiin Naýryz Muqanǵalievtiń tátesi Shilmaǵambetova da sotta jienine habarlasa almaǵanyn, biraq WhatsApp arqyly habarlamalar kelip turǵanyn aitqan edi.
Onyń sózinshe, Naýryzdyń atynan týystaryna anasynyń densaýlyǵy nasharlap, ony emdetý úshin Tashkentke alyp ketkeni jazylǵan. Sondai-aq emge aqsha qajet bolǵandyqtan, úidegi mal satyla bastaǵany túsindirilgen.
Aiyptaý aktisine sáikes, Maqsot Qarabalinge tiesili 17 qoi 950 myń teńgege satylǵan. Al Naýryz Muqanǵalievtiń atynan taǵy eki siyr 500 myń teńgege ótkizilgen.
Budan bólek, aiyptaý tarabynyń málimetinshe, Sársemáliev marqum týystarynyń bank kartalaryn paidalanyp, olardyń zeinetaqysy men áleýmettik tólemderin alýdy jalǵastyrǵan.
Prokýratýranyń dereginshe, marqumdardyń esepshottary arqyly memleketke 600 myń teńgeden astam shyǵyn kelgen. Al mal satýdan kelgen zalal 1 million 450 myń teńgeni quraǵan.
Prokýror Miras Baýyrjanovtyń aitýynsha, Naýryz Muqanǵaliev, Násip Óteshqalieva, Maqsot Qarabalin jáne Meiramgúl Qarabalina óltirilgennen keiin aiyptalýshy qylmys uzaq ýaqyt ashylmaidy dep oilaǵan. Sondai-aq ol keiin ózi boi tasalaýdy josparlaǵan degen nusqa aityldy.
