WhatsApp arqyly halyqty aldaǵandar ustaldy, - dep habarlaidy Dalanews.kz.
Kúdikti elorda turǵyndaryna Qytai men Túrikmenstannan halyq tutynatyn taýarlardy tikelei jetkizýge ýáde beretin qylmystyq jospar qurǵan.
Azamattardy aldaý úshin ol WhatsApp messendjerinde arnaiy toptar ashyp, taýarlardy naryqtyq qunnan tómen baǵamen jarnamalaǵan.
Osylaisha, 30 adamnyń 3 mln teńgeden astam qarjysyn iemdenip, alaiaq ol aqshany óz qajettilikterine jumsaǵan.
Sotta qylmystyq jaýapkershilikten jaltarýǵa tyrysyp, jábirlenýshilermen azamattyq-quqyqtyq qatynasta bolǵanyn kórsetti.
Memlekettik aiyptaýshy sottalýshynyń bastapqydan taýar jetkizýdi josparlamaǵanyn jáne ózine alǵan mindettemelerin oryndaýǵa nieti bolmaǵanyn dáleldedi.
Sot úkimimen ol 3 jylǵa bas bostandyǵynan aiyryldy.
Keltirilgen materialdyq shyǵyn sottalǵannan óndirildi.
Astana qalasynyń prokýratýrasy turǵyndarǵa messendjerlerde tómen baǵamen taýarlardy tikelei jetkizýge ýáde beretin kúmándi mámilelerden saq bolýdy eskertedi.
