QR Eńbek jáne halyqty áleýmettik qorǵaý vitse-ministri Asqarbek Ertaev Túrkistan oblysyna jumys sapary barysynda qonys aýdarý jónindegi óńiraralyq jármeńkege baryp, jergilikti atqarýshy organdardyń basshylarymen kezdesý ótkizdi, sondai-aq Eńbek mobildiligi ortalyǵynyń, Arnaýly kásiptik kolledjdiń jáne arnaýly áleýmettik qyzmetter kórsetý ortalyqtarynyń qyzmetimen tanysty, dep habarlaidy Dalanews.kz
Óńirge kelgen vitse-ministr birinshi rette Qostanai, Shyǵys Qazaqstan, Soltústik Qazaqstan, Pavlodar, Qaraǵandy, Abai jáne Ulytaý oblystarynan qatysýshylardy tarta otyryp, Túrkistan oblysynyń ákimdigi uiymdastyrǵan qonys aýdarý jármeńkesine bardy.
Asqarbek Ertaev Eńbek ministrligi qazaqstandyqtardy eńbek kúshi artyq óńirlerden eńbek kúshi tapshy óńirlerge óz erkimen kóshirý tetikterin jetildirý boiynsha júieli jumys júrgizilip jatqanyn atap ótti.
«Qonys aýdarýshylarǵa aýyl sharýashylyǵy maqsatyndaǵy jer ýchaskelerin 5 jyl merzimge ýaqytsha paidalanýǵa alýda jeńildikti jaǵdailar jasaldy. Qonys aýdarýshylarǵa tólenetin sýbsidiialar bankter men basqa qarjy uiymdary aldyndaǵy nesielik mindettemeler boiynsha óndirip alýdan qorǵalǵan. Qandastardy nemese qonys aýdarýshylardy qabyldaýdyń óńirlik kvotasyna engizý jáne erikti qonys aýdarýshylarǵa memlekettik qoldaý sharalaryn kórsetý boiynsha memlekettik qyzmetterdiń elektrondyq formatyna kóshý júzege asyryldy», – dep habarlady vitse-ministr.
Ol sondai-aq shyǵý jáne qabyldaý óńirleriniń eńbek mobildiligi ortalyqtaryna eńbek kúshi tapshy óńirlerge kóshýge niet bildirgen azamattardan keńes berý jáne ótinish berýge járdemdesý jónindegi jumysty jandandyrýdy usyndy.
Budan ári vitse-ministr óńirlik jumyspen qamtýdy úilestirý jáne áleýmettik baǵdarlamalar basqarmalarynyń basshylarymen, Túrkistan oblysy aýdandary men qalalary ákimderiniń orynbasarlarymen, óńirdiń áleýmettik mekemeleriniń ókilderimen kezdesý ótkizdi. Ol óz baiandamasynda arnaýly áleýmettik qyzmetter (budan ári – AÁQ) kórsetetin uiymdardyń ishki kóshi-qon jáne litsenziialaý máselelerine erekshe nazar aýdardy.
«Sońǵy bes jylda jumys kúshi artyq óńirlerden jumys kúshi tapshy óńirlerge 48,8 myń adam erikti túrde qonys aýdardy, onyń ishinde 14%-y Túrkistan oblysynan keldi. Ótken jyldyń ortasynan bastap barlyq qonys aýdarýshylarǵa FSM Social mobildi qosymshasyn engizý arqyly jergilikti qoǵamdastyqqa beiimdelý jáne integratsiialaý qyzmetteriniń keń spektri qol jetimdi boldy. Osy kezeńde 20,7 myń adam beiimdeý jáne integratsiialyq qyzmettermen qamtyldy», – dedi vitse-ministr.
Asqarbek Ertaev migration.enbek.kz portalynyń fýnktsionaly «Qonys aýdarý kartasy» modýlimen tolyqtyrylǵanyn aitty.
«Karta qandastar men qonys aýdarýshylarǵa onlain rejimde qonystaný aimaǵymen, sonymen birge eńbek naryǵyndaǵy aǵymdaǵy bos jumys oryndarymen, turǵyn úidiń jáne qoldanystaǵy infraqurylymnyń bolýymen tanysýǵa múmkindik beredi. Portalda bolý maqsatyna qaramastan Qazaqstanǵa keletin sheteldik azamattardyń biryńǵai esebi, sondai-aq kóshi-qon aǵyndarynyń monitoringi men baqylaýy júrgiziledi», – dedi ol.
Asqarbek Ertaev sondai-aq AÁQ kórsetetin uiymdardy litsenziialaý qyzmet kórsetý sapasyn arttyrýǵa, azamattardyń qaýipsizdigin qamtamasyz etýge jáne quqyqtaryn qorǵaýǵa baǵyttalǵanyn atap ótti.
Ol menshik túrine qaramastan memlekettik jáne jeke uiymdar litsenziialaýǵa jatatynyn atap ótti.
«Memlekettik jáne memlekettik emes uiymdar úshin árkelki jaǵdailar jasaýǵa qatysty Halyqty áleýmettik qorǵaý salasynda arnaýly áleýmettik qyzmetter kórsetý standarttary memlekettik jáne memlekettik emes menshik nysanyndaǵy uiymdarda AÁQ kórsetý sapasyna, kólemine jáne sharttaryna qoiylatyn talaptardy belgileitinin túsindiremin. Osylaisha, talaptar barlyq uiymdar úshin biryńǵai bolyp tabylady», – dep túiindedi Asqarbek Ertaev.
Jumys sapary aiasynda vitse-ministr Eńbek mobildiligi ortalyǵyna baryp, onda halyqty jumyspen qamtý jáne ishki kóshi-qon máseleleri boiynsha qyzmetter kórsetý boiynsha júrgizilip jatqan jumystarmen tanysty.
Asqarbek Ertaev sondai-aq Túrkistan oblysynyń arnaýly kásiptik kolledjiniń qyzmetimen tanysty, ol 15-35 jas aralyǵyndaǵy I, II jáne III toptaǵy múgedektigi bar adamdarǵa 3 mamandyq boiynsha kásibi bilim beredi: býhgalter-aýditor, tiginshi, aqparatty tsifrlyq óńdeý jónindegi maman.
Sonymen qatar, vitse-ministr №1 jáne №6 «Samǵaý» arnaýly áleýmettik qyzmet kórsetý ortalyqtaryna bardy. Mekemelerde psihikalyq jáne fizikalyq kemistigi, alkogolge nemese esirtkige táýeldiligi bar psihikalyq buzylýlardan zardap shegetin adamdarǵa AÁQ usynady.
Jumys saparynyń sońynda Asqarbek Ertaev tirek-qimyl apparaty buzylǵan 18 jasqa deiingi balalarǵa statsionarlyq jaǵdaida arnaýly áleýmettik qyzmetter kórsetetin 50 oryndyq jańa ortalyqtyqtyń qurylys barysymen tanysty.
