2025 jylǵy qańtar men 2026 jylǵy sáýir aralyǵynda álemdik naryqta volfram baǵasy 622 paiyz ósip, strategiialyq mańyzdy mineraldar arasyndaǵy eń joǵary ósimdi kórsetti. Bul kórsetkish ózge paidaly qazbalardyń baǵasyndaǵy ósimnen úsh eseden asa joǵary, dep habarlaidy dalanews.kz.
Osy kezeńde akkýmýliator óndirisi men joǵary tehnologiialyq salalarda qoldanylatyn birqatar mańyzdy mineraldardyń da quny aitarlyqtai artqan. Atap aitqanda, tantal 196%-ǵa, kobalt 134%-ǵa, neodim 116%-ǵa, litii 108%-ǵa, vismýt 95%-ǵa, qalaiy 65%-ǵa, hrom 53%-ǵa, mys 44%-ǵa, aliýminii 39%-ǵa, molibden 34%-ǵa, al vanadii 25%-ǵa qymbattaǵan.
Baǵanyń kúrt ósýine birqatar eldiń eksportqa engizgen shekteýleri men jetkizý tizbekteriniń shekteýli bolýy áser etken. Nátijesinde keiingi birneshe jyldaǵy salystyrmaly túrde baiaý naryqtyq kezeńnen keiin mańyzdy mineraldardyń quny aitarlyqtai kóterildi.
Aita keteiik, álemdik naryqtaǵy bul ózgerister Qazaqstan úshin de mańyzdy. Buǵan deiin elimizdiń Eýropalyq odaqqa ferrovolfram jetkizetin negizgi úsh eldiń qataryna kiretini belgili bolǵan. Bul baǵytta Qytai importtyń jalpy qunynyń 68%-yn qamtamasyz etip, kósh bastap tur. Odan keiin Vetnam 21%-ben ekinshi orynda bolsa, Qazaqstannyń úlesi 8%-dy quraidy. Sonymen qatar AQSh prezidenti Donald Tramptyń uldary Qazaqstandaǵy volfram ken oryndaryn igerýge jáne metall óndirý jobasyna qatysýǵa nietti ekenin málimdegen. Sarapshylardyń pikirinshe, volfram baǵasynyń rekordtyq deńgeide ósýi Qazaqstandaǵy mundai jobalardyń investitsiialyq tartymdylyǵyn odan ári arttyrýy múmkin.
