«Verum» seriktestigi Arysta zamanaýi meditsinalyq keshenniń irgetasy qalandy
Jalpy quny qural-jabdyqtarymen qosa eseptegende jarty milliard teńgeni quraityn investitsiialyq joba – Arys qalasy ákimdigi men «Verum» meditsinalyq kompaniiasynyń ózara bekitken memorandýmy aiasynda júzege asady.
Keshenniń irgetasyn qalaý rásimine Arys qalasynyń ákimi Gúljan Qurmanbekova men qalalyq máslihattyń hatshysy Amantai Baitanaev, «Verum» JShS kompaniialar tobynyń basshysy Álisher Esmaǵanbetov jáne jergilikti turǵyndar qatysty.
– Memleket basshysy Qasym-Jomart Toqaev biylǵy Joldaýynda «Meditsina salasyna investorlardy tartyp, ozyq tehnologiia men jańa zertteý jumystaryn igerýdi qolǵa alý kerek» degen bolatyn. Osyǵan orai, qarjysyn aýylǵa quiyp, Arys qalasyna qarasty eldi mekende sapaly meditsinalyq qyzmet kórsetem degen investorlarǵa biz árkez qoldaý kórsetýimiz kerek. Nátijesinde, halyqtyń densaýlyǵy nyǵaiyp, ómir súrý sapasy joǵarylaidy, – dedi qala ákimi G.Qurmanbekova.
Jalpy aýmaǵy 4 myń sharshy metrdi quraityn keshende alǵashqy meditsinalyq kómek pen kúndizgi jáne táýliktik statsionar, ońaltý ortalyǵy, institýt pen kolledj stýdentteri úshin meditsinalyq baza ornalasady. Eń bastysy, joba aiasynda kemi 100 jergilikti azamat jumyspen tolyq qamtamasyz etiledi.
Taǵy bir aita keterligi, mundai klinika óńirde alǵashqylardyń biri bolyp salynyp jatyr. Zamanaýi keshen paidalanýǵa berilgen soń, turǵyndarǵa kompiýterlik tomografiiadan ótý úshin Túrkistan men Shymkentke baryp áýrege túspeidi. Sonymen qatar, sapaly ári qoljetimdi meditsinalyq qyzmettiń igiligin Arys turǵyndary ǵana emes, kórshiles Ordabasy aýdanynyń turǵyndary da kóretin bolady.
