Qazirgi tańda Shyǵys Qazaqstan oblysynda 253 egý pýnktteri oblys turǵyndaryna qyzmet kórsetýde. Sondaı vaksınasıalaý pýnktiniń biri Óskemen qalasyndaǵy Ana men bala ortalyǵynda ornalasqan.
Qazir ortalyqqa ata-analar jasóspirim balalaryn ákelip vaksına salǵyzýda. Vaksınasıa pýktinde jumys isteıtin medısına mamandardy kúni búginge deıin 250-den astam jas jetkinshekke ekpe salǵandaryn aıtty.
SHQO Sanıtarıa-epıdemıologıalyq qadaǵalaý departamentiniń basshysynyń orynbasary Sáýle Slámǵazına Ana men bala ortalyǵyndaǵy vaksınasıalaý ortalǵyna kelip balasyna ekpe saldyrdy.
– Meniń kishi ulym 12 jasta. Ol vaksına qabyldaıtyn jasqa jetkendikten onyń epıdemıolog dáriger retinde vaksına qabyldaýyna ruqsat berdim. Bizde vaksınaǵa qatysty eshqandaı kúmán-kúdik bolmady. Budan basqa úlken eki bala da vaksına qabyldady. Ekpeniń keri áseri bolǵan joq. Sol sebepti ózge ata-analardy balalarynyń densaýlyǵyna jaýapkershilikpen qarap, vaksına qabyldaýyna ruqsat berý kerek ekenin aıtqym keledi, – deıdi Sáýle Slámǵazına.
Óz kezeginde Bala men ana ortalyǵyndaǵy epıdemıolog-ımmýnolog dáriger Ivan Mesherákov ekpeden keıin álsizdik, dene qyzýynyń kóterilýi jáne bas aýrý syndy janama áserler bolýy múmkin ekenin aıtty. Sonymen qatar vaksına salǵan ıneksıa ornynyń aýrsynýy múmkin ekenin de eskertti.
– Vaksına alǵannan keıin 72 saǵat ishinde onyń janama áseri baıqalýy múmkin. Budan qorqýdyń qajeti joq. Ol qalypty jaǵdaı. Eger dene qyzýy 39 gradýstan tómendemese birden dári ishýge bolmaıdy. Jas jetkinshekter ekpe alǵannan keıin 30 mınýtqa deıin dárigerlerdiń baqylaýynda bolady. Budan basqa úsh kúnge deıin ýchaskelik dáriger telefon arqyly balalardyń densaýlyǵyn baqylap otyrady, – dedi Ivan Mesherákov.
