Vagon toly jem-shóp Mańǵystaýǵa jete almai, orta jolda qaldy
Mal azyǵyn tieitin ár vagonǵa tasymaldaýshy kompaniia 500 myń teńge tóleńder degen talap qoiǵan. Odan qalsa temir jol boiynda turǵandaryń úshin kúnine 100 myń teńgeden beresińder dep doq kórsetip jatyr.
Sonyń saldarynan qazir shóp tielgen 5 vagon jipsiz bailanyp, taǵy sonsha shóp shoiyn jol boiynda jatyr.
Jut jailaǵan óńirge kómek kórsetpek bolǵan belsendi azamattardyń tasymaldaýǵa tóleitin qarjysy joq.
Qýańshylyqtan maly aram qatqan batys óńirine shóp jinap júrgen eriktilerge temirjol tasymaldaýshysy osydan bes kún buryn habarlasypty. Qaiyrymdy isten olar qansha vagon qajet bolsa da, aqysyz shóp jetkizý bizdiń moinymyzda dep sendirgen. Osydan keiin eriktiler shóp tielgen bes vagondy jóneltipti. Biraq arada úsh kún ótkende qaiyrymdy kóringen temirjolshylar sózinen taidy deidi belsendi azamattar.
Murat Soltanbai, erikti:
- Keshe osy bes vagondy jibereiin desek, bizge aitady, ol buiryqtyń bári ózgerip ketti dep sózderinen ainyp, bes vagonnyń árqaisyna tóleisińder, ár vagonǵa 500 myńnan artyq aqsha tóleisińder dep jatyr.
Onyń turǵanyna eki táýlikten asyp ketti, jai ǵana bir vagonǵa 100 myń teńgeden tóleisińder dep jatyr. Aqshasy ósip jatyr, esepke qoiyp qoidyq senderdi, kúnine bir vagon 100 myń teńgeden ósip jatyr, endi odan kóp tursa, budan da kóbeiip ketedi dep jatyr.
Eriktiler temirjolshylardyń sózine senip shópti kóp alyp qoidyq deidi. Tielip daiyn turǵan bes vagonnan bólek, janynda jantaq, saban, qamys pen jońyshqanyń taǵy da bes vagonǵa siiatyn býmalary jatyr.
El aýdarǵan aqshaǵa shópti satyp alý, aýdandardan jetkizý men júkshilerdiń eńbegin tólep júrgen eriktiler eger jol shyǵynyn tóler bolsaq, shóp alatyn aqsha qalmaidy dep otyr.
Sailaýbai Meiirbekov, erikti:
- Qazir taǵy 7 million aqsha bar mende. 7 millionnyń sál ústinde 12 myń teńge taǵy túsip jatyr, shiqyldap, mine. Endi osy qarajatqa shóp jiberýimiz kerek. Myna vagondarǵa aqsha alatyn bolsa, qarajattyń barlyǵy osyǵan keteiin dep tur. Odan shóp jiberý toqtap qalaiyn dep tur da. Biz qazir oilanyp otyrmyz, ony tólep jibere bereiik dep. Artynan shóp ketpei qala ma dep turmyz.
Al temir jol ókilderi eriktiler máseleni áý basta durys túsinbegen dep otyr. Kómekteseiik degenimiz ras, biraq bes vagonnan artyq tegin jetkizip bere almaimyz depti. Al vagondardyń turǵany úshin aqsha tóleý zańdy nárse dep túsindirdi.
Marat Ibraev, "Qazaqstan temir joly- júk tasymaly" AQ bas direktorynyń orynbasary:
- Men oǵan esh ýáde bergem joq, jaqsy, kómektesýimiz múmkin dedim. Men qolymda ondai jaýapkershilik alýǵa ókilettik joq
- Sonda endi kómektespeisiz be?
- Joq, qazir "QazTemirtrans" ókilderi sheship jatyr, ekspeditorlar tabamyz, olar rásimdeýge kelisim berse, onda bolady.
Onsyz da eldiń aqshasyna jiylǵan shópke birer vagon berý alpaýyt kompaniiaǵa aýyr másele siiaqty. Eriktiler qazir 10 vagonǵa siiatyn shóp jóneltýge daiyn deidi.
Tórt túligi ashtan qyrylyp jatqan Mańǵystaý óńirine kómek kórsetemiz degen el jem-shóbin áli de ákelip jatyr. Biraq ol shóp batys óńirge jóneltilmek túgili, vagondarǵa artylmai taý bolyp úiilip jatyr. Sondyqtan jol shyǵynyn óteýge qaiyrymdy jandar kómektespese, "Qazaqstan temir jolynan" qairan joq siiaqty.
https://www.youtube.com/watch?v=qj4ACOfCw8s
