مال ازىعىن تيەيتىن ءار ۆاگونعا تاسىمالداۋشى كومپانيا 500 مىڭ تەڭگە تولەڭدەر دەگەن تالاپ قويعان. ودان قالسا تەمىر جول بويىندا تۇرعاندارىڭ ءۇشىن كۇنىنە 100 مىڭ تەڭگەدەن بەرەسىڭدەر دەپ دوق كورسەتىپ جاتىر.
سونىڭ سالدارىنان ءقازىر ءشوپ تيەلگەن 5 ۆاگون ءجىپسىز بايلانىپ، تاعى سونشا ءشوپ شويىن جول بويىندا جاتىر.
جۇت جايلاعان وڭىرگە كومەك كورسەتپەك بولعان بەلسەندى ازاماتتاردىڭ تاسىمالداۋعا تولەيتىن قارجىسى جوق.
قۋاڭشىلىقتان مالى ارام قاتقان باتىس وڭىرىنە ءشوپ جيناپ جۇرگەن ەرىكتىلەرگە تەمىرجول تاسىمالداۋشىسى وسىدان بەس كۇن بۇرىن حابارلاسىپتى. قايىرىمدى ىستەن ولار قانشا ۆاگون قاجەت بولسا دا، اقىسىز ءشوپ جەتكىزۋ ءبىزدىڭ موينىمىزدا دەپ سەندىرگەن. وسىدان كەيىن ەرىكتىلەر ءشوپ تيەلگەن بەس ۆاگوندى جونەلتىپتى. ءبىراق ارادا ءۇش كۇن وتكەندە قايىرىمدى كورىنگەن تەمىرجولشىلار سوزىنەن تايدى دەيدى بەلسەندى ازاماتتار.
مۇرات سولتانباي، ەرىكتى:
- كەشە وسى بەس ۆاگوندى جىبەرەيىن دەسەك، بىزگە ايتادى، ول بۇيرىقتىڭ ءبارى وزگەرىپ كەتتى دەپ سوزدەرىنەن اينىپ، بەس ۆاگوننىڭ ءارقايسىنا تولەيسىڭدەر، ءار ۆاگونعا 500 مىڭنان ارتىق اقشا تولەيسىڭدەر دەپ جاتىر.
ونىڭ تۇرعانىنا ەكى تاۋلىكتەن اسىپ كەتتى، جاي عانا ءبىر ۆاگونعا 100 مىڭ تەڭگەدەن تولەيسىڭدەر دەپ جاتىر. اقشاسى ءوسىپ جاتىر، ەسەپكە قويىپ قويدىق سەندەردى، كۇنىنە ءبىر ۆاگون 100 مىڭ تەڭگەدەن ءوسىپ جاتىر، ەندى ودان كوپ تۇرسا، بۇدان دا كوبەيىپ كەتەدى دەپ جاتىر.
ەرىكتىلەر تەمىرجولشىلاردىڭ سوزىنە سەنىپ ءشوپتى كوپ الىپ قويدىق دەيدى. تيەلىپ دايىن تۇرعان بەس ۆاگوننان بولەك، جانىندا جانتاق، سابان، قامىس پەن جوڭىشقانىڭ تاعى دا بەس ۆاگونعا سياتىن بۋمالارى جاتىر.
ەل اۋدارعان اقشاعا ءشوپتى ساتىپ الۋ، اۋدانداردان جەتكىزۋ مەن جۇكشىلەردىڭ ەڭبەگىن تولەپ جۇرگەن ەرىكتىلەر ەگەر جول شىعىنىن تولەر بولساق، ءشوپ الاتىن اقشا قالمايدى دەپ وتىر.
سايلاۋباي مەيىربەكوۆ، ەرىكتى:
- ءقازىر تاعى 7 ميلليون اقشا بار مەندە. 7 ميلليوننىڭ ءسال ۇستىندە 12 مىڭ تەڭگە تاعى ءتۇسىپ جاتىر، شيقىلداپ، مىنە. ەندى وسى قاراجاتقا ءشوپ جىبەرۋىمىز كەرەك. مىنا ۆاگوندارعا اقشا الاتىن بولسا، قاراجاتتىڭ بارلىعى وسىعان كەتەيىن دەپ تۇر. ودان ءشوپ جىبەرۋ توقتاپ قالايىن دەپ تۇر دا. ءبىز ءقازىر ويلانىپ وتىرمىز، ونى تولەپ جىبەرە بەرەيىك دەپ. ارتىنان ءشوپ كەتپەي قالا ما دەپ تۇرمىز.
ال تەمىر جول وكىلدەرى ەرىكتىلەر ماسەلەنى ءاۋ باستا دۇرىس تۇسىنبەگەن دەپ وتىر. كومەكتەسەيىك دەگەنىمىز راس، ءبىراق بەس ۆاگوننان ارتىق تەگىن جەتكىزىپ بەرە المايمىز دەپتى. ال ۆاگونداردىڭ تۇرعانى ءۇشىن اقشا تولەۋ زاڭدى نارسە دەپ ءتۇسىندىردى.
مارات يبرايەۆ، "قازاقستان تەمىر جولى- جۇك تاسىمالى" اق باس ديرەكتورىنىڭ ورىنباسارى:
- مەن وعان ەش ۋادە بەرگەم جوق، جاقسى، كومەكتەسۋىمىز مۇمكىن دەدىم. مەن قولىمدا ونداي جاۋاپكەرشىلىك الۋعا وكىلەتتىك جوق
- سوندا ەندى كومەكتەسپەيسىز بە؟
- جوق، ءقازىر "قازتەمىرترانس" وكىلدەرى شەشىپ جاتىر، ەكسپەديتورلار تابامىز، ولار راسىمدەۋگە كەلىسىم بەرسە، وندا بولادى.
ونسىز دا ەلدىڭ اقشاسىنا جيىلعان شوپكە بىرەر ۆاگون بەرۋ الپاۋىت كومپانياعا اۋىر ماسەلە سياقتى. ەرىكتىلەر ءقازىر 10 ۆاگونعا سياتىن ءشوپ جونەلتۋگە دايىن دەيدى.
ءتورت تۇلىگى اشتان قىرىلىپ جاتقان ماڭعىستاۋ وڭىرىنە كومەك كورسەتەمىز دەگەن ەل جەم-شوبىن ءالى دە اكەلىپ جاتىر. ءبىراق ول ءشوپ باتىس وڭىرگە جونەلتىلمەك تۇگىلى، ۆاگوندارعا ارتىلماي تاۋ بولىپ ءۇيىلىپ جاتىر. سوندىقتان جول شىعىنىن وتەۋگە قايىرىمدى جاندار كومەكتەسپەسە، "قازاقستان تەمىر جولىنان" قايران جوق سياقتى.
https://www.youtube.com/watch؟v=qj4ACOfCw8s
