Bul týraly Almaty oblysy ákiminiń orynbasary Bahtiiar Ónerbaev aitty dep habarlaidy «QazAqparat».
«Aǵaiyndy jigitterdiń ólimine bailanysty materialdyq kómek kórsetiledi degen keibir BAQ-tardaǵy aqparat durys emes. Resmi túrde málimdeimin. Aldyn ala biz eshqandai ýáde bergenimiz joq. Tergeý júrip jatyr. Kúdiktiler ustaldy. Sot ótsin, anyqtalsyn. Bul qylmystyq oqiǵa. Qazaqpyz ǵoi, aýdan, aýyl ákimderine tapsyrma berdik, baryp, qaiǵylaryna ortaqtasyp, qarailasý jaǵyn tapsyrdyq. Aýdan ákimi otyn, sýyn túsirip berip qoldan kelgenshe kómegin kórsetip jatyr. Ákimshilik shet qarap otyrǵan joq. Musylmannyń paryzy ǵoi kóńil aitý. Oblys ákimi baqylaýynda ustap otyr. Búgingi apparat jiynynda surap, tapsyrmalaryn berdi», - dedi Bahtiiar Ónerbaev.
Eske sala keteiik, ótken jeksenbide BAQ-ta Almaty oblysy Jambyl aýdanynda mal saýdasymen ainalysyp júrgen úsh jigittiń joǵalyp ketkeni týraly habarlanǵan bolatyn.
Marqumdardyń týysqandarynyń aitýynsha, Doldanuly Jarqynbek (1979 jyly týǵan), Zarlyhanuly Muqiiat (1973 jyly týǵan), Álimhan Qadylbek Shyǵys Qazaqstan oblysynyń Tarbaǵatai aýdanynan satyp alǵan 40 bas maldy eki júk kóligimen 17 qyrkúiek kúni Uzynaǵash bazaryna shyǵarǵan. Sodan iz-túzsiz joǵalyp ketken. Birneshe kúnnen keiin olardyń denesi tabyldy.
24 qyrkúiekte Almaty oblystyq Ishki ister departamentiniń baspasóz qyzmeti iz-túzsiz joǵalǵan úsh aǵaiyndynyń ólimine qatysty kúdiktiler ustalǵanyn habarlady.
«Oblystyq IID basshysynyń birinshi orynbasary podpolkovnik Nurlan Másimov basshylyq etken izdeý sharalaryna aýdandyq jáne aimaqtyq politseiler de jumyldyryldy. Joǵalǵandardy óltirdi degen kúdikpen Jambyl aýdanynyń eki azamaty ustaldy. Jábirlenýshilerdiń deneleri tabyldy. QR QK 99-baby, 2-bólimi boiynsha (Kisi óltirý) qylmystyq is qozǵaldy», - delingen baspasóz qyzmetiniń habarynda.
Kisi óltirý faktisi boiynsha tergeý jumystary Almaty oblystyq Ishki ister departamenti basshylyǵynyń qatań baqylaýyna alynǵan.
