Oral qalasynyń turǵyny ári muǵalim Ainur Sabyr Batys Qazaqstan oblysynyń ákimi Nariman Tereǵaliulynyń áreketine bailanysty Prezidentke, Úkimetke jáne Parlament depýtattaryna ashyq túrde úndeý joldady. Onyń aitýynsha, byltyrǵy sý tasqynynan keiin berilgen jańa úidi oblys basshylyǵy “zańsyz berilgen” dep sot arqyly tartyp almaq, dep habarlaidy Dalanews.kz.
“Qurmetti QR Prezidenti Qasym-Jomart Kemeluly Toqaev! QR Premer-ministri Oljas Bektenov! QR Parlamentiniń Senat tóraǵasy Máýlen Áshimbaev! QR Parlamentiniń Májilis tóraǵasy Erlan Qoshanov! Májilis depýtattary Abzal Quspan, Ashat Aimaǵambetov, Nartai Sársenǵaliuly, Baqytjan Bazarbek myrzalar! Sizderden kómek suraimyn!
Meniń aty-jónim – Ainur Sabyr. Oral qalasynyń turǵynymyn. Muǵalimmin.
2024 jyly Oral qalasyn sý basqan kezde asa iri kólemde zardap shektim. Oral qalasy aýmaǵynda ornalasqan, ishine gaz, jaryq, sý tartylǵan úlken qysqy úiim sýǵa ketip, bir ai boiy sý astynda turdy.
QR Prezidenti Q.K. Toqaevtyń “Sý tasqynynan zardap shekkender úisiz qalmasyn” degen tapsyrmasyna orai, Oral qalasy ákimdigi 2024 jyly jaramsyz úidiń ornyna úi berip, shyǵyndarymyzdy ótegen bolatyn”, - deidi ol.
Onyń aitýynsha, barlyq tekserýden ótken qujattar komissiia tarapynan rastalyp, mamandar úidi “turýǵa jaramsyz” dep tanyǵan. Osylaisha arnaiy komissiialar “úi berilsin” degen sheshim shyǵarǵan.
“Alaida bir jyldan keiin Batys Qazaqstan oblysynyń ákimi Nariman Tóreǵaliuly turǵyndardy sotqa berip, Oral qalasy ákimdigi bergen úidi zańsyz dep tanýdy surap otyr”, - dep qosty ol.
Aitýynsha, tótenshe jaǵdaidan zardap shekkenderge Prezidenttiń tapsyrmasymen elimizdiń kásipkerleri kómektesken.
“Maǵan da qala ákimdigine sýǵa ketýden zardap shekken turǵyndarǵa demeýshilikpen “Alageum” zaýyty alyp bergen úilerdiń biri berildi. Úidiń kiltin zaýyt direktory Dúren myrza ulym ekeýimizge óz qolymen tabystaǵan bolatyn”, — dedi ol.
Ainur Sabyrdyń sózinshk, BQO ákimi Nariman Tóreǵaliev bul úilerdi “zańsyz berilgen” dep tanytpaq.
“Endi zardaptyń qara bulty seiilip, bastan ótken aýyr jaǵdaidy umyta bastasaq, oblys ákimi óz turǵyndaryna ozbyrlyq kórsetip, tisin batyryp otyr”, - deidi ol.
Muǵalim bul másele boiynsha Oral qalalyq prokýratýrasy da kezinde qujattardy qarap, zardap shekken otyzdan astam turǵynǵa birdei sanatpen úi berilgenin aitady.
“Jaǵdaiymyz birdei. Qylyshyn súiretip qys kelgende oblys ákimi bizdi qaida jibermek? Jaramsyz úilerimiz buzyldy. Jeri úkimettiń ieligine ótip ketti. Endi biz qaida baramyz?
Álde Prezidenttiń tapsyrmasy tótenshe jaǵdaidyń daý-damaiy basylǵansha ǵana oryndalǵan ba?
Oblys ákimi óz turǵyndaryna janashyrlyq tanytpasa, bizge kim kómektesedi?”, — dep qosty ol.
Keiinirek Ainur Sabyr Batys Qazaqstan oblysynyń ákimi Nariman Tóreǵalievke qatysty kezekti málimdemesin jariialady. Aitýynsha, ákim tarapynan ózine qatysty “alaiaq” degen sipattaǵy kózqaras baiqalyp, berilgen úige bailanysty sotqa tartý jumystary ádiletsiz júrgizilip jatyr.
“Ákimniń meni alaiaq qylyp kórsetetin jaýabyn tyńdaýǵa daiynmyn. Úidi ákimnen tartyp alǵan joqpyn, basyp kirgen joqpyn. Tótenshe jaǵdaidan zardap shegýshi dep tanyp, bir jyl buryn ruqsat bergen ózderi. Kiltti ákimniń qolynan alǵan joqpyn, demeýshi tarap tabystady”, — dep jazdy ol.
Ol ózine berilgen úidiń oblys ákimine “basqa josparlar” boiynsha qajet bolǵandai kóringenin ashyq aitady.
“Ákimniń maǵan bergen úige basqaaaa jeke jospary bolǵan siiaqty... Ol úidiń maǵan berilip qoiǵany ózin de, ózgeni de biraz sergeldeńge salypty deidi-mys... Bul bir úlken hikaia...“ — deidi muǵalim.
Ainur Sabyr ákimniń otyz turǵynnyń ishinen tek ózine qatysty sotqa talap qoiýyn túsinbeitinin atap ótti.
“Nariman Tóreǵaliuly, meni úi berilgen otyzdyqtan bólip alyp, sotqa bergenińiz qalai? Sotqa berdiń be, otyz adamdy birge ber. Álde otyzdy shýlatpai, otyzdyń bireýine shyqqan sheshimmen “otyz qoiandy atyp almaqshysyz ba?” Álde maqsatyńyz basqa ma? Áńgime maǵan berilgen úide me?” — dep jazdy ol.
Muǵalim ótken jylǵy apat kezindegi ákimniń áreketin eske saldy.
“Jurt sýmen alysyp, qujatyn qolyna ustap, árli-berli sergeldeńmen júrgende siz aldymyzǵa kelip, halyqtyń aldyna shyǵyp, sharasyzdan shyqqan jasymyzdy súrtip, "Ainalaiyndar" degen joqsyz ba?
Myna marapatty da men sizden tartyp aldym ba?
Úiińizben qosa, marapatyńyzdyń kúshin joiyp, sotpen tartyp alyńyz” — deidi turǵyn.
