Qazaqstandyqtardyń shetelde myńnan astam jyljymaıtyn múlki men kólikteri bar bolyp shyqty. Bul - jalpyǵa birdeı tabysty deklarasıalaý sharasynan keıin Memlekettik kirister komıteti tirkegen faktiler, dep habarlaıdy Dalanews.kz.

2023 jyldyń qorytyndysy boıynsha qazaqstandyqtardyń shetelde 286 kólik quraly jáne 1002 jyljymaıtyn múlki tirkeldi. Muny el azamattary deklarasıanyń 270.00 nysanyn toltyrý kezinde kórsetti, delingen Memlekettik kirister komıtetiniń LS basylymynyń resmı saýalyna bergen jaýabynda.

"Qazaqstan azamattaryna tıesili eń kóp sheteldik jyljymaıtyn múlik Reseıde ornalasqan - 780. Ekinshi orynda – Túrkıa (81), úshinshi orynda – Grýzıa (18) tur. Al AQSH-ta tórt nysan tirkelgen", delingen habarlamada.

Al kólik quraldary, qundy qaǵazdar jáne basqa da qarjylyq aktıvter boıynsha eń kóbisi AQSH-ta (177), odan keıin Reseıde (59), Grýzıada (6) tirkelgen.

Byltyr qarashada jarıalanǵan derekterge súıensek, 18 853 qazaqstandyq deklarasıanyń 250.00 nysanynda elden tys jerde 24 541 jyljymaıtyn múlki baryn kórsetken. 6,6 myń azamat shetelde 7 myńnan astam kólikke ıe ekenin málimdegen. Buǵan qosa, 9,9 myń qazaqstandyq sheteldik bankterde 4,6 myń bank shotyn ashqany anyqtaldy.

Sonymen qatar, 22,6 myń azamat shetelde debıtorlyq jáne kredıtorlyq bereshegi bar ekenin kórsetken. Al 4,3 myń adam sheteldik kompanıalardyń jarǵylyq kapıtalynda úlesi baryn aıtqan: olardyń jalpy sany 5,3 myńnan asady.

Bul derekter qazaqstandyqtardyń sheteldegi aktıvteriniń aıtarlyqtaı kóptigin ári olardyń sheteldegi ınvestısıalyq belsendiligin kórsetedi. Munyń barlyǵy elimizdegi kapıtaldyń syrtqa ketýimen qatar, qazaqstandyqtardyń qarjylyq múmkindikteri men halyqaralyq naryqtardaǵy belsendiliginiń de aıqyn dáleli bolyp otyr.