Qazaqstanda muǵalimderdi mindetine jatpaityn jumysqa jegý áli tyiylmai tur. Tamyz aiynda oqý-aǵartý ministri Ǵani Beisembaev oblys jáne qala ákimderin jinap, pedagogtardy qosymsha jumysqa tartýdyń zańsyz ekenin tikelei túsindirmek, dep habarlaidy Dalanews.kz.
Ministrdiń aitýynsha, muǵalimderdi jaǵajai kúzetýge shyǵaryp, kóshede kezekshilikke qoiý – ashyq zań buzýshylyq. Osyǵan bailanysty ministrlik sheneýnikterdi jeke-jeke jinap, arnaiy túsindirý jumysyn júrgizýge májbúr bolyp otyr.
«Zań boiynsha muǵalimderge mindetine jatpaityn sharýalardy artýǵa qatań tyiym salynǵan. Biz osy máseleni birneshe márte aityp ta, eskertip te júrmiz. Biraq, ókinishke qarai, keibir qala men aýdan ákimderi bul talapty elemeidi. Júieli túrde bolmasa da, mundai jaittar jii qaitalanýda. Sondyqtan tamyz aiynda barlyq deńgeidegi ákimderdi jinap, arnaiy jiyn ótkizemiz. Olarǵa tikelei zań normalaryn túsindirip, qajet bolsa zańnyń kóshirmesin qoldaryna ustatamyz. Bálkim, sonda túsinikti bolar», – dedi ministr Beisembaev.
Ministrdiń bulai ashynýy tegin emes. Jaqynda ǵana Qostanai qalasynyń ákimi Marat Júndibaev muǵalimderdi ózen-kóldiń jaǵalaýyna kezekshilikke qoiǵan edi. Ministrliktiń der kezinde aralasýy arqasynda muǵalimder bul jumystan bosatylǵan.
«Men Qostanai ákimimen tikelei sóilesken joqpyn, biraq orynbasarym birden habarlasyp, jaǵdaidy túsindirdi. Bul máselege Eńbek ministrligi men Tótenshe jaǵdailar ministrligi de aralasýǵa májbúr boldy. Osydan keiin ákim qajetti qorytyndy shyǵarar degen úmittemin», – deidi ministr.
Ministrlik pedagogtardyń quqyǵyn qorǵaýǵa aldaǵy ýaqytta da qatań qaraitynyn eskertti.
