25 jeltoqsanda Qazaqstannyń batysynda, Aqtaý qalasyna jaqyn mańda Ázerbaijan ushaǵy apatqa ushyrady. Qaiǵyly jaǵdai saldarynan 38 adam jan tapsyrdy. Ishinde qazaqstandyqtar da bar.
Dalanews.kz Qazaqstannyń qurmetti aviatory, osy salada 30 jyldan asa tájiribesi bar avia-injener Erǵazy Ábiruly Joldasovtyń ushaq apatyna qatysty pikirin suurady.
Qai boljam shyndyqqa sai kelýi múmkin?
Qazir BAQ pen áleýmettik jelide ushaq apatyna qatysty túrli boljam aitylyp jatyr: qustarmen soqtyǵysý, borttaǵy ballonnyń jarylýy, t.s.s. Sarapshy bul baǵyttaǵy óz oiyn aitty.
"Birinshi kezekte ushaq qai eldiki, sol el basymdyqta. Odan soń sol ushaqty shyǵarǵan zaýyt basymdyqta, olar ózderiniń úlesin qorǵaidy. Bári osy taraptardyń sheshimine bailanysty bolady", - deidi ol.
Midjourney/Tengrinews.kz
Reseilik zymyrannyń qatysy bary ras pa?
Euronews ázerbaijandyq ushaqtyń apatqa ushyraýyna reseilik zymyran sebep bolǵanyn jazdy. Bul týraly basylymǵa Ázerbaijan Úkimetiniń derekkózi habarlaǵan. Basylym málimetine súiensek, zymyran Groznyi aspanyndaǵy drondar belsendi bolyp turǵan kezde atylǵan, onyń synyqtary ushaqtyń janynda jarylyp, syrtqy qaptamasyna zaqym keltirip, jolaýshylar men ekipaj múshelerine tigen.
Sondai-aq, basylym málimetinshe, ushqyshtar apat jaǵdaiynda qonýdy suraǵan, biraq Resei áýejailarynyń eshqaisyna qonýǵa ruqsat etilmegen, keiin Kaspii teńizi arqyly Aqtaý baǵytyna jiberilgen.
Sarapshy bul syrdyń bárin qara jáshik ashatynyn aitady.
"Apatqa ne sebep bolǵanyn, ne úshin tetikteri isten shyqqanyn - bárin qara jáshiktiń qupiiasy ashylǵannan keiin komissiia músheleri aityp beredi. Bul boljam ǵana", - dedi ol.
TJM
Nege Aqtaý baǵyty tańdalǵan?
Avia-injener Erǵazy Joldasovtyń aitýynsha, ushaq apatyn tergeý jumystary ortasha eseppen bir jyldan birneshe jylǵa sozylýy múmkin.
"Keide qara jáshik, keide durys derek tabylmai jatady. Daý týǵyzatyn eshqandai jaǵdai bolmasa, tez sheshilýi múmkin", - deidi ol.
Sondai-aq, sarapshy nege dál Aqtaý baǵyty tańdalǵanyn túsindirdi.
"Aqtaý men Bakýdiń arasynda kúnde ushyp júrgen ushqyshtar ǵoi. Aqtaý aerodromyn, ol jer ashyq ekenin, aýa raiy qolaily ekenin biledi, sol úshin tańdaǵan dep oilaimyn. Aqtaý bas tartqan joq, qabyldap aldy", - deidi maman.
instagram.com/mangystau_audany
Ushaq nege teńizge qonbady?
"Teńizge qonǵanda birde bir adam tiri qalmaýshy edi. Óitkeni, birinshiden, basqarýy joǵalǵan ushaqty teńizdiń betine qondyrý múmkin emes. Ekinshiden, teńizden ushaq ishindegi jolaýshylardy qutqarý da óte qiyn. Sondyqtan teńiz, odan keiin eldi meken ústinen ótip, eń qolaily jerge qondyrǵan ushaqtyń kásibiligi bas iiýge turarlyq. Jany jánnatta bolsyn!" - dep túiindedi sarapshy.
Aqtaýdaǵy ushaq apaty týraly ne belgili?
25 jeltoqsanda jergilikti ýaqyt boiynsha 11.30-da Aqtaý mańynda Bakýden Groznyiǵa ushyp bara jatqan ushaq apatqa ushyrady. Bul — Azerbaijan Airlines áýekompaniiasyna tiesili Embraer 190 ushaǵy.
Aqparat boiynsha ushaq bortynda 67 adam, onyń ishinde 5 ekipaj múshesi bolǵan. Jolaýshylar reisi qatty tumanǵa bailanysty Groznyiǵa qona almaǵan, aldymen Mahachkalaǵa, sodan keiin Aqtaýǵa baǵyttalǵan.
Apattan 6 qazaqstandyq kóz jumdy. Jalpy qaza tapqandar sany — 38. 29 adam aman qaldy.
