سونداي-اق، باسىلىم مالىمەتىنشە، ۇشقىشتار اپات جاعدايىندا قونۋدى سۇراعان، ءبىراق رەسەي اۋەجايلارىنىڭ ەشقايسىنا قونۋعا رۇقسات ەتىلمەگەن، كەيىن كاسپيي تەڭىزى ارقىلى اقتاۋ باعىتىنا جىبەرىلگەن.
ساراپشى بۇل سىردىڭ ءبارىن قارا جاشىك اشاتىنىن ايتادى.
25 جەلتوقساندا قازاقستاننىڭ باتىسىندا، اقتاۋ قالاسىنا جاقىن ماڭدا ازەربايجان ۇشاعى اپاتقا ۇشىرادى. قايعىلى جاعداي سالدارىنان 38 ادام جان تاپسىردى. ىشىندە قازاقستاندىقتار دا بار.
Dalanews.kz قازاقستاننىڭ قۇرمەتتى اۆياتورى، وسى سالادا 30 جىلدان اسا تاجىريبەسى بار اۆيا-ينجەنەر ەرعازى ءابىر ۇلى جولداسوۆتىڭ ۇشاق اپاتىنا قاتىستى پىكىرىن سۇۇرادى.
قاي بولجام شىندىققا ساي كەلۋى مۇمكىن؟
ءقازىر ب ا ق پەن الەۋمەتتىك جەلىدە ۇشاق اپاتىنا قاتىستى ءتۇرلى بولجام ايتىلىپ جاتىر: قۇستارمەن سوقتىعىسۋ، بورتتاعى باللوننىڭ جارىلۋى، ت.س.س. ساراپشى بۇل باعىتتاعى ءوز ويىن ايتتى.
"ءبىرىنشى كەزەكتە ۇشاق قاي ەلدىكى، سول ەل باسىمدىقتا. ودان سوڭ سول ۇشاقتى شىعارعان زاۋىت باسىمدىقتا، ولار وزدەرىنىڭ ۇلەسىن قورعايدى. ءبارى وسى تاراپتاردىڭ شەشىمىنە بايلانىستى بولادى"، - دەيدى ول.
Midjourney/Tengrinews.kz
رەسەيلىك زىمىراننىڭ قاتىسى بارى راس پا؟
Euronews ازەربايجاندىق ۇشاقتىڭ اپاتقا ۇشىراۋىنا رەسەيلىك زىمىران سەبەپ بولعانىن جازدى. بۇل تۋرالى باسىلىمعا ازەربايجان ۇكىمەتىنىڭ دەرەككوزى حابارلاعان. باسىلىم مالىمەتىنە سۇيەنسەك، زىمىران گروزنىي اسپانىنداعى دروندار بەلسەندى بولىپ تۇرعان كەزدە اتىلعان، ونىڭ سىنىقتارى ۇشاقتىڭ جانىندا جارىلىپ، سىرتقى قاپتاماسىنا زاقىم كەلتىرىپ، جولاۋشىلار مەن ەكيپاج مۇشەلەرىنە تيگەن.
"اپاتقا نە سەبەپ بولعانىن، نە ءۇشىن تەتىكتەرى ىستەن شىققانىن - ءبارىن قارا جاشىكتىڭ قۇپياسى اشىلعاننان كەيىن كوميسسيا مۇشەلەرى ايتىپ بەرەدى. بۇل بولجام عانا"، - دەدى ول.
تجم
نەگە اقتاۋ باعىتى تاڭدالعان؟
اۆيا-ينجەنەر ەرعازى جولداسوۆتىڭ ايتۋىنشا، ۇشاق اپاتىن تەرگەۋ جۇمىستارى ورتاشا ەسەپپەن ءبىر جىلدان بىرنەشە جىلعا سوزىلۋى مۇمكىن.
"كەيدە قارا جاشىك، كەيدە دۇرىس دەرەك تابىلماي جاتادى. داۋ تۋعىزاتىن ەشقانداي جاعداي بولماسا، تەز شەشىلۋى مۇمكىن"، - دەيدى ول.
سونداي-اق، ساراپشى نەگە ءدال اقتاۋ باعىتى تاڭدالعانىن ءتۇسىندىردى.
"اقتاۋ مەن باكۋدىڭ اراسىندا كۇندە ۇشىپ جۇرگەن ۇشقىشتار عوي. اقتاۋ اەرودرومىن، ول جەر اشىق ەكەنىن، اۋا رايى قولايلى ەكەنىن بىلەدى، سول ءۇشىن تاڭداعان دەپ ويلايمىن. اقتاۋ باس تارتقان جوق، قابىلداپ الدى"، - دەيدى مامان.
instagram.com/mangystau_audany
ۇشاق نەگە تەڭىزگە قونبادى؟
"تەڭىزگە قونعاندا بىردە ءبىر ادام ءتىرى قالماۋشى ەدى. ويتكەنى، بىرىنشىدەن، باسقارۋى جوعالعان ۇشاقتى تەڭىزدىڭ بەتىنە قوندىرۋ مۇمكىن ەمەس. ەكىنشىدەن، تەڭىزدەن ۇشاق ىشىندەگى جولاۋشىلاردى قۇتقارۋ دا وتە قيىن. سوندىقتان تەڭىز، ودان كەيىن ەلدى مەكەن ۇستىنەن ءوتىپ، ەڭ قولايلى جەرگە قوندىرعان ۇشاقتىڭ كاسىبيلىگى باس يۋگە تۇرارلىق. جانى ءجانناتتا بولسىن!" - دەپ تۇيىندەدى ساراپشى.
اقتاۋداعى ۇشاق اپاتى تۋرالى نە بەلگىلى؟
25 جەلتوقساندا جەرگىلىكتى ۋاقىت بويىنشا 11.30-دا اقتاۋ ماڭىندا باكۋدەن گروزنىيعا ۇشىپ بارا جاتقان ۇشاق اپاتقا ۇشىرادى. بۇل — Azerbaijan Airlines اۋەكومپانياسىنا تيەسىلى ەمبراەر 190 ۇشاعى.
اقپارات بويىنشا ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان. جولاۋشىلار رەيسى قاتتى تۇمانعا بايلانىستى گروزنىيعا قونا الماعان، الدىمەن ماحاچكالاعا، سودان كەيىن اقتاۋعا باعىتتالعان.
اپاتتان 6 قازاقستاندىق كوز جۇمدى. جالپى قازا تاپقاندار سانى — 38. 29 ادام امان قالدى.
قايعىلى وقيعادان كەيىن ازەربايجاندا جالپىۇلتتىق ازا تۇتۋ كۇنى جاريالاندى. تۇستە بۇكىل ەل بويىنشا مەملەكەتتىك تۋلار ءتۇسىرىلىپ، كولىكتەر توقتادى. ازەربايجاندىقتار قازا تاپقانداردى ءبىر مينۋت ۇنسىزدىكپەن ەسكە الدى.
