Qazaqstannyń Tótenshe jaǵdailar ministrligi Aqtaý mańyndaǵy ushaq apatynan qaza tapqan qazaqstandyqtardyń tizimin jariialady. Qaza tapqandardyń arasynda jas dáriger, stomatolog Sálima Jýtaeva bar, - dep habarlaidy Dalanews.kz.
25 jeltoqsanda Embraer ERJ-190 ushaǵynda bolǵan alty Qazaqstan azamatynyń esimderi resmi túrde jariialandy. Olardyń arasynda Mańǵystaý oblysynyń úsh turǵyny, astanalyq áiel men onyń uly jáne Qostanai oblysynyń týmasy Sálima Jýtaeva bar.
Sálima 29 jasta bolǵan. Ol Qostanaida stomatolog bolyp jumys istegen. Sálima Jýtaeva tragediiadan úsh kún buryn Instagram paraqshasynda ázerbaijan tilinde "Sen jańbyrdaǵy kún siiaqtysyń" dep jazba jariialaǵan.
Sálima Jýtaevanyń paraqshasynda onyń stomatolog ekeni jáne saiahattaýdy unatatyny jazylǵan. Sondai-aq, onyń ómirine bailanysty Qostanai men Groznyi qalalary atalady. Qyzdyń paraqshasynda kásibi qyzmetin kórsetetin kóptegen sýret bar.
Marqumnyń oqyrmandary onyń otbasy men jaqyndaryna kóńil aityp jatyr.
