22 jeltoqsanda Almatydaǵy Qalqaman aialdamasynda avtobýs jaiaý júrginshilerdi qaǵyp ketip, 3 adam qaitys boldy. Qazir osy oqiǵaǵa qatysty sot otyrysy ótip jatyr, - dep habarlaidy Dalanews.kz.
Kezekti tyńdalymda birinshi sóz jábirlenýshi taraptyń qorǵaýshysyna berilgen. Zańger bul joly jantúrshigerlik kólik apatynda kóz jumǵan azamattardyń jaqyndarynyń talaptaryn jipke tizip shyqty.
"Almaty" telearnasy málimetinshe, sýdia jaýapty kompaniia "DýmanTranstyń", kólik júrgizýshisi Ermek Shókebaevanyń jáne sottalýshy Darhan Ahmetjanovtyń Azamattyq kodekstiń "birlesip keltirilgen ziian" baby boiynsha 40 million teńge kóleminde moraldyq shyǵyn óteýge mindettelýin surap otyr.
"Avtobýs júrgizýshisi Shókebaevaǵa qatysty qylmystyq is qysqarylǵanymen, azamattyq talap boiynsha biz sol avtobýstyń iesi "DýmanTransqa" jáne sonyń júrgizýshisi Shókebaevaǵa moraldyq shyǵyndy óteý týraly azamattyq talap-aryz bere alamyz", - deidi jábirlenýshi taraptyń qorǵaýshysy Aitynǵali Tabyldin.
Dúiim jurttyń jaǵasyn ustatqan oqiǵaǵa qatysty kezekti sot otyrysynda avtobýs ishinde bolǵan kýágerler de sóiledi. Anasynyń ruqsatyn alǵan soń sot zalyna kámeletke tolmaǵan jasóspirim shaqyrylyp, kólik júrgizýshisi men sottalýshynyń arasynda bolǵan janjaldyń mán-jaiyn túsindirdi. Sondai-aq, kýáger Ermek Shókebaevanyń tolyq esinen tanyp qalǵanyn joqqa shyǵardy. Onyń aitýynsha, júrgizýshi abyr-sabyr bastalǵanda oǵan "tejegishti bas" degen eken.
"Bul kisi ortańǵy esikten túsip ketpekshi boldy. Al júrgizýshi aldyńǵy esikten shyǵyp, chek kórsetýin talap etti. Bul kisi chekti kórsete almady. Kóp nárse aityldy negizi, "osy jerden túsirip ket, bolmasa, men seni úitemin-búitemin" degendei. Júrgizýshi "qolyńnan kelse istep kór" dep qarsy sóz aitty", - deidi kýáger.
Eske salaiyq, 2023 jylǵy jeltoqsanda Almatyda avtobýs aialdamada turǵan bir top adamdy qaǵyp ketken edi. Saldarynan 3 adam mert boldy.
Keiin qoǵamdyq kólik júrgizýshisin urǵan er adam ustaldy. Bul derek negizinde QR QK-niń 345-baby 3-bóligi boiynsha sotaldy tergeý de bastaldy.
Al avtobýs júrgizýshisi keshirim surady.
"Men osy qaiǵyly jaǵdaiǵa bailanysty qaza tapqan marqumdardyń týystaryna kóńil aitamyn. Meniń tarapymnan eshqandai ádeii osylai isteiin degen niet bolǵan joq. Mundaidy jaýyma da tilemespin. Ózimdi kináli sanamaimyn. Jolaýshy esimnen tanyp qalǵansha urdy.
Aýrýhanada jatqanymda tergeýshi keldi. Bireýi er, ekinshisi áiel. Siz zardap shegýshisiz. Kináńiz joq dep aitqan. Endi jazylyp shyqqanda aýyr bap boiynsha aiyptap jatqanyn bildim. Ózim arendaǵa úi jaldap turamyn. Eki balam bar. Solar úshin eńbek etip kelemin. Meniń jumysyma eshkim shaǵymdanbaǵan. Maǵan osyndai qylmystyq kodeks boiynsha ne úshin aýyr aiyp taǵyp jatqanyn túsinbeimin. Eger soqqy almaǵanymda, mundai jol apatyna jol bermes edim. Ádildik bolady dep úmittenemin", – deidi Ermek Shókebaeva.
Sonymen qatar, Almatydaǵy avtobýs apatynan qaza tapqandardyń jaqyndary buǵan deiin de ótemaqy talap etti.
Avtobýs apatynan qaza tapqan erli-zaiypty Talap Qosymov pen Gúljahan Jetpisbaevanyń týysy Súiinbai Ońalbekuly park ókilderiniń bir aptadan keiin ǵana kóńil aitqanyn jetkizdi. Olardyń aitýynsha, tipti sol kezde de kómek kórsetý týraly jaq ashpaǵan. Al bul otbasynyń artynda tórt balasy qalǵan. Turyp jatqan baspanalary da nesiege alynǵan eken.
"Bankten 17 million, qalǵanyn ózderi aýyldaǵy úileri men kólikterin satyp páter aldy. Sol banktegi aqshasy jabylsa, balalaryna baspana qalar edi. Endi avtobýs parki jaǵynan úmit kútip otyrmyz. Úmitimizdi aqtaityn shyǵar degen oidamyz", – dedi Súiinbai Ońalbekuly.
