Asyl tuqymdy mal sanyn kóbeitý, ónimin eksportqa shyǵarý boiynsha birqatar jumystar atqarylyp, qarjylyq kómek kórsetý sharalary da qolǵa alynǵan.
Osy rette Úrjarlyq jeke kásipker Máýlitbek Qalievtyń sharýa qojalyǵy buǵan dálel. Máýlitbek Qaliev asyl tuqymdy mal sharýashylyǵyn damytýǵa basa nazar aýdaryp otyr.
Kásipker 2003 jyly jer alyp, jeke qojalyq qurady. Sol kezde nebary 200 gektar jaiylymy, 35 gektar egistigi ǵana bolǵan shaǵyn sharýashylyqtyń isi búginde ońǵa basyp, alǵa órleýde.
Kásipker irgesin qalaǵan qojalyqtyń aty "Alǵabas" dep atalady.
"Isimiz alǵa basyp, atqarǵan eńbegimizdiń jemisin jeý úshin yrymdap "Alǵabas" dep qoidym. 2007 jyly «asyl tuqymdy» mal fermasy mártebesin aldyq. Árine, aitqan ońai. Anyǵynda kóptegen qiyndyqtarǵa kezdestik. Soǵan qaramai bastaǵan isimizdi sońyna deiin jetkizýdi maqsat tuttyq", – deidi kásipker.
Búginde ol angýs pen sharolle tuqymdas iri qara maldardy ósirip, aýdan ekonomikasynyń órkendeýine eleýli úles qosýda.
"2013 jyly memlekettiń járdemimen Frantsiiadan 226 bas «Sharole» asyl tuqymdy malyn ákeldik, oǵan qosa 475 bas «Angýs» asyl tuqymdy iri qara satyp aldyq. Ázir iri qaranyń sanyn kóbeitýdi kózdep otyrmyz, qazirgi olardyń sany 1300-den asady", – deidi ol.
Máýlitbek Qalievtiń aitýynsha, ol byltyr Ózbekstanǵa 130 tonnadan astam et eksporttaǵan. Búginde bul sharýa qojalyqta jetpisten astam jumys isteýde.
Qoi sharýashylyǵyn asyldandyrýdy qolǵa alǵan sharýashylyq qazirgi tańda 1228 bas «Baiys» dep atalatyn asyl tuqymdy qoi ósirip otyr. Qojalyqta 1668 bas jylqy bar.
Naýqan kezinde sharýashylyqtaǵy jumysshylardyń sany 100-ge jetedi. Kásipker olardyń barlyǵy ailyǵyn úzbei tólep otyr. Qojalyqtaǵy ortasha ailyq 60-70 myń teńgeniń tóńireginde.
"Jalaqy máselesine jaýappen qaraimyn. Qaramaǵymdaǵy jumysshylardyń otbasy, bala-shaǵasy bar. Sondyqtan ailyq máselesi bizdiń qojalyqta birinshi kezekte sheshiledi. Budan bólek belsendi jumysshylarǵa syiaqy taǵaiyndap, ártúrli áleýmettik kómek kórsetip turýǵa tyrysamyz", – deidi Máýlitbek Qaliev.
Úrjar aýdandyq kásipkerlik jáne aýylsharýashylyǵy bóliminiń basshysy Bolat Erzatovtyń aitýynsha, biyl Úrjarlyq sharýa qojalyqtary maldaryn Ózbekstanmen qatar Resei memleketine eksportqa shyǵarmaqshy.
– Aýdanda memlekettiń qoldaýymen jyl saiyn mal bordaqylaý alańdary ashylýda. Úrjardaǵy eń iri «Alǵabas» sharýa qojalyǵynyń mal bordaqylaý alańyna usaq sharýalar biriktirilip, sharýalaryn dóńgeletip jatyr. Asyl tuqymdy maldar semirtilip, keibireýleriniń salmaǵy 450 kelige deiin jetedi, - deidi bólim basshysy.
Ásem Jumaǵaliqyzy
