Semei qalalyq aýrýhanasynda Besterek aýylynda bolǵan jol apatynda aýyr jaraqat alǵan 9 jastaǵy qyz bala kóz jumdy. Ol osy ýaqytqa deiin es-tússiz komada jatqan edi, dep habarlaidy Dalanews.kz.
“Naýqas qyzdyń jaǵdaiy óte aýyr edi. Dárigerler onyń ómiri úshin kúresti. Bar múmkindikti jasady. Alaida ol alǵan jaraqattary saldarynan esin jimastan qaitys boldy”, — dep málimdedi Abai oblysynyń densaýlyq saqtaý basqarmasy.
Eske sala ketsek, 19 tamyzda Abai oblysynyń Úrjar aýdanynda 55 jastaǵy júrgizýshi úidiń qaqpasy mańynda oinap júrgen alty balany kólikpen qaǵyp ketken edi. Sol sátte úsheýi — eki, bes jáne segiz jastaǵy balalar oqiǵa ornynda qaza tapty. Sondai-aq 6-9 jas aralyǵyndaǵy taǵy úsh bala jaraqat aldy.
Kólik júrgizýshisi eki aiǵa qamaýǵa alyndy. Onyń týystarynyń aitýynsha, apatqa júrek talmasy sebep bolǵan.
Aita keteiik, buǵan deiin Astana qalalyq Densaýlyq saqtaý basqarmasynyń baspasóz qyzmeti zardap shekken eki bala aýrýhanadan shyqqany týraly málimdegen edi.
“Búginde eki balanyń jaǵdaiy jaqsy. Turaqty. Shaǵymdary joq”, — delingen málimdemede.
