Shyǵys Qazaqstan oblysynda "Altai" tehnoparkyndaǵy memleket úlesiniń 78 paiyzy zańsyz túrde jekemenshikke ótkeni anyqtaldy. Bul týraly Qarjylyq monitoring agenttiginiń (QMA) baspasóz qyzmeti málimdedi, dep habarlaidy Dalanews.kz.
"QMA-nyń ShQO boiynsha departamenti memleket qatysatyn úlesti zańsyz ielikten shyǵarý deregi boiynsha tergeýdi aiaqtady. D. Serikbaev atyndaǵy Shyǵys Qazaqstan tehnikalyq ýniversiteti – elimizdegi aldyńǵy qatarly joǵary oqý oryndarynyń biri. Ol metallýrgiia, mashina jasaý, energetika, meditsinalyq tehnika jáne basqa da salalarǵa mamandar daiarlaidy. Ýniversitettiń 17 ǵylymi ortalyǵy, zerthanasy men ǵylymi-óndiristik alańy bar. Alaida 2018–2020 jyldar aralyǵynda ýniversitettiń burynǵy basshylyǵy "Altai" tehnoparkiniń jarǵylyq kapitalyndaǵy memleketke tiesili 78% majoritarlyq úlesti zańsyz jeke menshikke ótkizgen", – delingen juma kúni taratylǵan resmi habarlamada.
QMA málimetinshe, Memleket basshysynyń zańsyz shyǵarylǵan aktivterdi qaitarý jónindegi tapsyrmasy aiasynda ýniversitetke «Altai» tehnoparkindegi 100% úlesti qaitarý boiynsha sharalar qabyldanǵan. Oǵan tehnoparktiń jalpy quny 1,5 mlrd teńgeni quraityn 8 myń sharshy metrlik ǵimaraty men 1,3 gektar jer telimi kiredi.
"Qaitarylǵan aktivter zerthanalar men oqý kabinetterin ornalastyrýǵa, sondai-aq travmatologiia, ortopediia jáne onkologiialyq protezdeý ónimderin óndiretin meditsinalyq innovatsiialyq klasterdi damytýǵa jumsalatyn bolady. Aktivterdi qaitarý jumysy ári qarai jalǵasady", – dep tolyqtyrdy vedomstvo.
