شىعىس قازاقستان وبلىسىندا "التاي" تەحنوپاركىنداعى مەملەكەت ۇلەسىنىڭ 78 پايىزى زاڭسىز تۇردە جەكەمەنشىككە وتكەنى انىقتالدى. بۇل تۋرالى قارجىلىق مونيتورينگ اگەنتتىگىنىڭ (قما) باسپا ءسوز قىزمەتى مالىمدەدى، دەپ حابارلايدى Dalanews.kz. 

"قما-نىڭ شقو بويىنشا دەپارتامەنتى مەملەكەت قاتىساتىن ۇلەستى زاڭسىز يەلىكتەن شىعارۋ دەرەگى بويىنشا تەرگەۋدى اياقتادى. د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى – ەلىمىزدەگى الدىڭعى قاتارلى جوعارى وقۋ ورىندارىنىڭ ءبىرى. ول مەتاللۋرگيا، ماشينا جاساۋ، ەنەرگەتيكا، مەديسينالىق تەحنيكا جانە باسقا دا سالالارعا ماماندار دايارلايدى. ۋنيۆەرسيتەتتىڭ 17 عىلىمي ورتالىعى، زەرتحاناسى مەن عىلىمي-وندىرىستىك الاڭى بار. الايدا 2018–2020 جىلدار ارالىعىندا ۋنيۆەرسيتەتتىڭ بۇرىنعى باسشىلىعى "التاي" تەحنوپاركىنىڭ جارعىلىق كاپيتالىنداعى مەملەكەتكە تيەسىلى 78% ماجوريتارلىق ۇلەستى زاڭسىز جەكە مەنشىككە وتكىزگەن"، – دەلىنگەن جۇما كۇنى تاراتىلعان رەسمي حابارلامادا.

قما مالىمەتىنشە، مەملەكەت باسشىسىنىڭ زاڭسىز شىعارىلعان اكتيۆتەردى قايتارۋ جونىندەگى تاپسىرماسى اياسىندا ۋنيۆەرسيتەتكە «التاي» تەحنوپاركىندەگى 100% ۇلەستى قايتارۋ بويىنشا شارالار قابىلدانعان. وعان تەحنوپاركتىڭ جالپى قۇنى 1،5 ملرد تەڭگەنى قۇرايتىن 8 مىڭ شارشى مەترلىك عيماراتى مەن 1،3 گەكتار جەر تەلىمى كىرەدى.

"قايتارىلعان اكتيۆتەر زەرتحانالار مەن وقۋ كابينەتتەرىن ورنالاستىرۋعا، سونداي-اق تراۆماتولوگيا، ورتوپەديا جانە ونكولوگيالىق پروتەزدەۋ ونىمدەرىن وندىرەتىن مەديسينالىق يننوۆاسيالىق كلاستەردى دامىتۋعا جۇمسالاتىن بولادى. اكتيۆتەردى قايتارۋ جۇمىسى ءارى قاراي جالعاسادى"، – دەپ تولىقتىردى ۆەدومستۆو.