Kókshetaýdaǵy QR IIM Ulttyq ulany 5510 áskeri bóliminiń áskeri qyzmetshileri endi tańǵy as, túski as nemese keshki as kezinde qansha mólsherde aqýyz, mai jáne kómirsý tutynǵanyn bile alady. Sonymen qatar ár taǵamǵa baǵa berýge múmkindik bar, dep habarlaidy dalanews.kz.
Bul málimetter tsifrlyq taldaýǵa engizilip, áskeri qyzmetshilerdiń taǵamǵa qatysty qalaýyn eskerýge jáne qajet bolǵan jaǵdaida as mázirin túzetýge múmkindik beredi. Mundai tásil Ishki ister ministriniń orynbasary – Ulttyq ulannyń Bas qolbasshysy general-leitenant Ańsaǵan Baltabekovtiń tapsyrmasy boiynsha júzege asyrylýda. Júieniń jumysyn jasandy intellekt tehnologiiasy qoldanylatyn otandyq «E-Qamqorlyq» baǵdarlamalyq-apparattyq kesheni qamtamasyz etedi.
As úlestirý jelisine ornatylǵan FoodPos qurylǵysy jergilikti jasandy intellekt kómegimen áskeri qyzmetshiniń ydysyndaǵy taǵamdardy tanyp, olardyń kólemin anyqtaidy. Sondai-aq taǵamnyń kaloriiasyn, aqýyz, mai jáne kómirsý mólsherin kórsetedi.
Júiede keri bailanys tetigi de qarastyrylǵan. Tamaqtanǵannan keiin áskeri qyzmetshi taǵamnyń sapasyn baǵalai alady. Eger belgili bir taǵamdar únemi tómen baǵa alsa nemese olardyń edáýir bóligi jelinbei qalsa, bul derekter kelesi as mázirin ázirleý kezinde eskeriledi. Osylaisha, áskeri qyzmetshiniń pikiri onyń kúndelikti tamaqtanýyn jetildirýdiń bir quralyna ainalady.
Pilottyq joba iske qosylǵan alǵashqy ailarda Q-Voice tsifrlyq keri bailanys paneli arqyly 1,5 myńǵa jýyq baǵa berilgen.
Júie tamaqtanýdy uiymdastyrýǵa qatysty basqa da protsesterdi: azyq-túlikti satyp alý men saqtaýdan bastap, sanitariialyq talaptardyń saqtalýyna jáne ashana qyzmetkerleriniń jumysqa ruqsat normalaryna sáikestigin qadaǵalaidy. Atap aitqanda, Q-Store qoimadaǵy azyq-túliktiń esebin júrgizip, olardyń jaramdylyq merzimin baqylaidy. Q-HACCP temperatýra, ylǵaldylyq jáne sanitariialyq talaptardyń saqtalýyn qadaǵalaidy. Al Q-Staff qyzmetkerlerdiń jumys ýaqytyn jáne meditsinalyq ruqsattaryn baqylaýǵa múmkindik beredi.
«E-Qamqorlyq» júiesi qazir 5510 áskeri bóliminde synaqtan ótkizilýde. Jobanyń tiimdiligi dáleldengen jaǵdaida, bul tájiribeni Ulttyq ulannyń ózge de áskeri bólimderinde qoldaný josparlanyp otyr.
