Qazaqstanda 2029 jyldyń sońyna deiin Ulttyq qordan shamamen 6,5 trln teńge bólinip, el boiynsha áleýmettik, kólik jáne injenerlik infraqurylym nysandary salynady, dep habarlaidy Dala News.
Aqorda málimetinshe, Memleket basshysy Úkimetke buryn-sońdy bolmaǵan Infraqurylymdyq jańǵyrý josparyn ázirleýdi tapsyrdy.
Jospar aiasynda óńirlerde 70-ke jýyq densaýlyq saqtaý nysany salynady. Olardyń qatarynda perzenthanalar, aýrýhanalar, jedel meditsinalyq kómek stantsiialary, balalarǵa arnalǵan ońaltý ortalyqtary jáne erekshe balalardyń qajettilikterine beiimdelgen sport zaldary bar.
Sonymen qatar 50-ge jýyq bilim berý, sport jáne mádeniet mekemesiniń qurylysy bastalady. Prezident asa qajetti nysandardyń qurylysyn jedel bastap, olardy qysqa merzimde paidalanýǵa berýdi tapsyrdy.
«Eń bastysy, jumsalǵan aqshanyń ekonomikalyq jáne áleýmettik qaitarymy bolýy qajet. Óitkeni bólinetin memleket qarajatynyń negizgi maqsaty – halyqtyń ál-aýqatyn kóterý», – dedi Qasym-Jomart Toqaev.
Memleket basshysy jobalardy júzege asyrýǵa materialdyq-tehnikalyq bazasy jaqsy ári tájiribesi mol jergilikti shaǵyn jáne orta biznes ókilderin tartý qajettigin atap ótti. Qurylys jumystarynyń barysy qatań baqylaýǵa alynady.
Aqorda málimetinshe, Halyqaralyq valiýta qorynyń boljamyna sáikes, biyl Qazaqstannyń jalpy ishki ónimi 400 mlrd dollarǵa jýyqtap, jan basyna shaqqandaǵy kórsetkish 19 myń dollardan asady. Altyn-valiýta rezervteri men Ulttyq qor aktivteriniń jalpy kólemi 130 mlrd dollardan asqan.
Prezident Ulttyq qordyń qarajatyn qazirgi jáne keleshek urpaqtyń igiligine jumsaý qajettigin aitty. Onyń sózinshe, qor qarajatyn jinaqtaý men paidalaný arasynda teńgerim saqtalyp, qarjy qoǵamǵa barynsha paidaly jobalarǵa baǵyttalýǵa tiis.
Sondai-aq biyl jáne 2027 jyldyń alǵashqy eki aiynda áleýmettik jobalardy iske qosý úshin 1,5 trln teńge qarastyrý tapsyryldy.
