8-13 qyrkúiek aralyǵynda Astanada ótken 5-shi Dúniejúzilik kóshpendiler oiyndaryna 89 elden 2500-den astam sportshy qatysty. Bul shara Qazaqstan úshin ǵana emes, búkil etnosport álemi úshin de jyldyń basty oqiǵalarynyń biri boldy.
5-shi Dúniejúzilik kóshpendiler oiyndaryn uiymdastyrý direktsiiasynyń basshysy Nail Nurov birneshe márte atap ótkendei, Qazaqstanda Oiyndardy ótkizýdiń negizgi maqsaty – ulttyq sport túrlerin damytyp, ulttyq sporttyq dástúrlerdi jańǵyrtý. "Biz bul merekeni qazaqstandyqtar men sheteldik qonaqtar úshin uiymdastyrdyq. Basty mindetimizge qol jetkizdik – óskeleń urpaqtyń ulttyq sport túrlerine degen qyzyǵýshylyǵyn arttyra aldyq jáne halqymyzdyń bai mádenietin kórsettik. Búginde oblystyq sport basqarmalarynyń telefon jelileri kókpar, báige jáne basqa da ulttyq sport túrlerine qatysýǵa niet bildirgen balalardyń ata-analarynyń qońyraýlarynan bosamai jatyr. Bizdiń kóshpendiler oiyndarynyń chempiondaryn - kókparshylar men balýandardy kóshede tanityn boldy. Olar jastarymyzǵa úlgi bolarlyq qarapaiym, biraq el namysyn qorǵap júrgen sportshylar", – dedi Nail Nurov.
Oiyndardan keiin elde balalar men jastardyń ulttyq sport túrlerine qyzyǵýshylyǵy kúrt ósti. Óńirlerde ulttyq sport túrleri sektsiialaryna qatysýǵa niet bildirýshilerdiń qatary kóbeidi.
"Bizdiń ortalyq biylǵy mamyr aiynan beri jumys isteidi, biraq balalardyń qyzyǵýshylyǵy dál Kóshpendiler oiyndarynan keiin kúrt artty. Qyrkúiektiń ózinde ulttyq sport sektsiialaryna 50-den astam adam jazyldy. Biz toǵyzqumalaq, qusbegilik, qazaq kúresi boiynsha qosymsha toptar ashtyq. Qarasha aiynda dástúrli sadaq atý sektsiiasyn iske qosý josparymyzda", – dedi Almaty qalasyndaǵy klýb jetekshisi Nurlan Ospanov.
Abai oblysynyń "Ulttyq jáne at sporty túrleri ortalyǵy" sport klýbynyń direktory Bolat Aqjigitovtiń aitýynsha, óńirde ulttyq sport túrlerimen ainalysqysy keletinderdiń sany kúrt ósken. Teńge ilý sektsiiasy ashylǵan, sondai-aq, jaqynda jamby atý boiynsha top qurylady dep kútilýde.
"Oiyndar aiaqtalǵannan beri eki aptaǵa jýyq ýaqyt ótti. Soǵan qaramastan biz áli de qazaqstandyqtar men sheteldik qatysýshylardan keri bailanys alyp jatyrmyz. 5-shi Dúniejúzilik kóshpendiler oiyndary kóshpendiler órkenietiniń bai murasyn kórsetip qana qoimai, sheteldik qonaqtardy qazaq mádenieti, ulttyq taǵamdary jáne ulttyq sport túrlerimen tanystyrýǵa múmkindik berdi. Mundai is-sharalar Qazaqstan úshin ulttyq bolmysymyzdy saqtaýǵa jáne durys ulttyq ideologiiany qalyptastyrýǵa qajet", – dep atap ótti Nail Nurov.
Qazaqstan Respýblikasy Týrizm jáne sport ministrliginiń málimetinshe, Oiyndar kezinde tek Astananyń ózinde eQonaq júiesi arqyly 12,5 myń sheteldik týrist tirkelgen. Qazirgi ýaqytta Dúniejúzilik kóshpendiler oiyndary elimizdiń ekonomikasyna shamamen 300 million teńge kiris ákeldi. Degenmen, naqty sandardy shaǵyn jáne orta kásiporyndar salyq esepterin tapsyrǵannan keiin bilýge bolady.
"Aldyn ala boljam jasaǵanamyzdai, 5-shi Dúniejúzilik kóshpendiler oiyndaryna Qazaqstannan, jaqyn jáne alys shetelden 100 000-ǵa jýyq týrist qatysady dep kútken edik. Alaida, jarystar men etnoaýyl aýmaǵyn jáne ǵylymi konferentsiiany 250 000-nan astam elorda turǵyndary men qonaqtary tamashalady.
Áleýmettik-mádeni jobany uiymdastyrý kezinde biz qarjylyq jaǵyn esten shyǵarmadyq, biraq basty maqsatymyz ol emes edi. Biz bul turǵyda da kútkenimizden asyp tústik. Qazirge túsken qarjy týraly aitýǵa erte. Degenmen, úlken týristik aǵyn shaǵyn jáne orta bizneske qoldaý kórsetti. Qalanyń barlyq qonaqúileri tolyp, meiramhanalar men kafeler qonaqtarǵa lyq toldy, barlyq merch, kádesyilar jáne ulttyq kiimder satylyp ketti, eń tanymal jarystarǵa biletter tolyqtai satyldy. Aita keterligi, etnoaýyl aýmaǵyndaǵy saýda oryndary tegin negizde uiymdastyryldy. Irikteý kezinde basty talap - joǵary sapa boldy. Sondai-aq, Dúniejúzilik kóshpendiler oiyndaryn Qazaqstanda ótkizý uzaq merzimdi investitsiia ekenin atap ótkim keledi. Qazaqstan biýdjettik qarajat esebinen kóshpendiler oiyndaryna qatysqan sheteldik sportshylardyń shyǵyndaryn ótedi. Endi, óz kezeginde, qazaqstandyq sportshylar aldaǵy Dúniejúzilik kóshpendiler oiyndaryna tegin qatysatyn bolady", – dedi Direktsiia basshysy.
5-shi Dúniejúzilik kóshpendiler oiyndarynyń arqasynda júz myńnan astam týrist Qazaqstan men onyń biregei mádenietimen tanysyp, jyldyń eń mańyzdy oqiǵasynyń bir bólshegine ainalyp úlgerdi.
