Baiqaýdyń negizgi maqsaty – ulttyq sportty nasihattaý jáne qalamgerlerge qoldaý kórsetý, olardy ulttyq sport túrleri týraly jańa týyndylardy jazýǵa yntalandyrý.
Osyǵan orai Almatydaǵy Qazaqstan Jazýshylar odaǵynda ótken jiynda ádebi baiqaý resmi túrde jariialandy. Kezdesýge Qazaqstan Jazýshylar odaǵy basqarmasynyń tóraǵasy Mereke Qulkenov, Ulttyq sport Qaýymdastyǵynyń prezidenti Islambek Saljanov, sondai-aq Asanáli Áshimov, Dýlat Isabekov, Smaǵul Elýbai, Beksultan Nurjekeev, Qanaz Moldahmet syndy ziialy qaýym ókilderi men qoǵam qairatkerleri qatysty. Sonymen qatar, búkil álemdi tańqaldyryp júrgen, qazaqtan shyqqan halyqaralyq dárejedegi tuńǵysh shabandoz Baýyrjan Myrzabaev sharanyń qurmetti qonaǵy boldy.
Qazaqstan Jazýshylar odaǵy basqarma tóraǵasy Mereke Qulkenov kórkem ádebiette ulttyq múddege sai keletin týyndylardyń úlesin arttyrý qajet ekenin atap ótti.
«Ónerdiń ishindegi eń bir qasterlisi – kórkem ádebiet. Sondyqtan shyǵarmashylyq ziialy qaýym, jazýshy qaýym ókilderi úshin «Qulager» ádebi baiqaýynyń mańyzy zor. Óskeleń urpaqtyń kitap oqýǵa degen qyzyǵýshylyǵyn oiatýǵa bar kúsh-jigerimizdi salamyz», - dedi Mereke Qulkenov.
Ulttyq sport qaýymdastyǵynyń prezidenti Islambek Saljanov respýblikalyq ádebi baiqaýdyń mańyzyna toqtaldy.
– Memleket basshysy Qasym-Jomart Kemeluly Toqaev ulttyq ideologiia men jańa qoǵamdyq etikany qalyptastyrýǵa bas nazar aýdarǵany belgili. Bul rette biyl ótetin 5-shi Dúniejúzilik kóshpendiler oiyndary qarsańynda qalamgerler arasynda «Qulager» respýblikalyq baiqaýynyń jariialanýy qýanyshty jańalyq. Árine, baiqaý ataýy kezdeisoq tańdalmaǵany belgili. Óitkeni Iliias Jansúgirovtiń «Qulageri» – eshqashan eskirmeitin, máńgi jas poeziia. Qazaq ádebietine jańa esimder men tyń týyndylar qosylyp, ulttyq ádebietimizdi baiyta túsedi degen senimdemin, – dedi Islambek Saljanov.
Sonymen qatar, Ulttyq sport qaýymdastyǵynyń prezidenti «Qazaq ádebieti» gazeti ujymyn basylymnyń 90 jyldyq mereitoiymen quttyqtady.
Baiqaýǵa qatysatyn jumystar ulttyq sport túrlerine arnalýy shart. Konkýrstyq shyǵarmalar Ulttyq sport qaýymdastyǵy quramyna resmi túrde kiretin «Teńge Ilý», «Báige», «Jamby atý», «Aýdaryspaq», «Kókpar», «Toǵyzqumalaq», «Qusbegilik», «Sadaq atý», «Asyq atý», «Joryq» sport túrlerin basty taqyryp etýi kerek. Sonymen qatar, qatysýshylardyń jasyna shekteý qoiylmaidy.
Baiqaýda mynadai nominatsiialar bolady:
- Úzdik poeziia
- Úzdik proza
- Balalarǵa arnalǵan úzdik shyǵarma
- Úzdik komiks
- Úzdik drama
- Úzdik derekti proza
- Úzdik fantastikalyq/mifologiialyq shyǵarma
Baiqaýǵa buryn esh jerde jariialanbaǵan, tek qana osy jylǵy qańtar men maýsym aralyǵynda jazylǵan jańa shyǵarmalar qabyldanady.
Ár nominatsiia boiynsha úzdik dep tanylǵan týyndynyń avtory jeńimpaz atanyp, oǵan «Qulager» baiqaýynyń avtorlyq músinshesi jáne Ulttyq sport qaýymdastyǵy 2 000 000 (eki million) teńge kóleminde qarjylai syiaqy beriledi.
Jeńimpazdar qazylar alqasynyń sheshimimen anyqtalyp, tamyz aiynda marapattalady.
Baiqaýǵa qatysýǵa ótinim berý úshin http://qulager.ultsport.kz/ saitynda saýalnamany toltyryp, shyǵarmany júkteý qajet. Tolyq aqparatty qulagerultsport@gmail.com elektrondyq poshtasy arqyly uiymdastyrý komitetinen nemese kórsetilgen bailanys telefondary arqyly bilýge bolady: +7 700 098 2025 (Juldyz Orazymbet), +7 701 516 5584 (Hadisha Erseitova).
Is-sharaǵa qatysty barlyq fotosýretter men videolar osy siltemede: https://t.me/kulager2024
