Otandyq ádebiettiń eń tanymal 100 týyndysyn anyqtaýǵa arnalǵan jalpyhalyqtyq saýalnama aiaqtalýyna bir aidan sál ǵana astam ýaqyt qaldy. Búginde daýys berýge 16 myńnan astam azamat qatysqan. Saýalnama eGov Mobile qosymshasy arqyly onlain formatta ótip jatyr jáne 23 shildege deiin jalǵasady. Finaldyq tizim Abai kúni – 10 tamyzda jariialanady.
Daýys berý óte ońai – eGov Mobile mobildi qosymshasyn júktep, saýalnamalar bóliminde daýys berý jetkilikti. Qatysýshy 1-den 10-ǵa deiin kitapty tańdap, olardyń ataýy men avtoryn kórsetýi tiis.
Mamandardyń aitýynsha, bul saýalnama qazaqstandyqtardyń qandai janrlarǵa kóbirek qyzyǵatynyn anyqtaýǵa kómektesip qana qoimai, baspagerlerge, kitaphanalarǵa jáne kitap dúkenderine belgili bir baǵyt beredi.
Joba biyl 23 sáýirde – elimizde alǵash ret Ulttyq quryltai músheleriniń usynysymen atap ótilgen Ulttyq kitap kúni dúniege keldi. Bul bastamany Memleket basshysy Qasym-Jomart Toqaev qoldady. Prezident qoǵamda oqý mádenietin qalyptastyrý men ádebietti nasihattaýdyń mańyzdylyǵyn birneshe ret atap ótken bolatyn.
Sonymen qatar, «100 kitap» jobasy aiasynda qatysýshylarǵa simvolikalyq syilyqtar qarastyrylǵan. Jobanyń seriktesi – «Meloman-MARWIN» dúkender jelisiniń qoldaýymen 5000-shi jáne 11000-shi daýys berýshilerge syilyq kartalary tabystaldy. Bul oqyrmandar úshin jaǵymdy tosynsyi bolyp qana qoimai, azamattardy súiikti 100 kitapty tańdaýǵa belsendi tartýǵa qosymsha yntalandyrý boldy. Máselen, 5000-shi daýys bergen – almatylyq Akerke Nyshanova bolsa, 11000-shi qatysýshy – Oral qalasynyń turǵyny Maral Jumaǵaliev boldy.
Aita keteiik, oqý mádenietin ilgeriletý isine «AMANAT» partiiasy da belsendi atsalysýda. 2023 jylǵy qyrkúiekten bastap partiia «Kitap-AMANAT» jobasyn iske asyryp keledi. Joba aiasynda el boiynsha, ásirese shaǵyn qalalar men aýyldarda 23 kitap ortalyǵy ashyldy. Bul ortalyqtarda ádebi keshter, jazýshylarmen kezdesýler, mánerlep oqý saiystary ótedi. Jalpy sany 700-den astam is-shara uiymdastyryldy. Sonymen qatar, joba aiasynda «AMANAT» partiiasy men Qazaqstannyń baspagerler, poligrafister jáne kitap taratýshylar qaýymdastyǵy arasynda ózara yntymaqtastyq týraly memorandýmǵa qol qoiyldy. Qujat aiasynda baspalar kitap ortalyqtaryn qoljetimdi baǵamen qajetti ádebiettermen qamtamasyz etýde. Bul tek qazaqstandyq ádebiet týyndylary ǵana emes, sonymen birge álemdik bestsellerlerdi de qamtidy.
Saýalnama týraly tolyǵyraq: https://100kitap.kz/
