Ulttyq Banktiń tóraǵasy Timýr Súleimenov Úkimettiń keńeitilgen otyrysynda Ulttyq qor qarjysynan iske asyrylatyn jobalardy baǵalaýdyń jańa tetigin tanystyrdy. Onyń aitýynsha, bul tetik iske qosylyp, óz tiimdiligin tanytsa Ulttyq qordan ýys-ýys aqsha alý tyiylatyn kórinedi. Bul týraly Dalanews.kz portaly habarlaidy.
Súleimenovtiń aitýynsha, buǵan deiin Ulttyq qor esebinen satyp alynǵan obligatsiialardyń merzimi tym uzaq, syiaqy mólsherlemesi de naryqtyq talaptarǵa sai deńgeide bolmaǵan.
"Bul Ulttyq qordyń tikelei ári aitarlyqtai shyǵynǵa ushyraýyna ákelip soqty. Endi biz osy sharttardy naryqqa barynsha jaqyndattyq. Bul qor men bolashaq urpaqtyń múddesin teńdestirýge múmkindik berip, strategiialyq jobalardy júzege asyrýdyń mańyzdylyǵyn arttyrady. Osylaisha úkimetpen birlesip, Ulttyq qordan qarjylandyratyn jobalardy baǵalaýdyń jańa tetigi ázirlendi", – dedi ol.
Ulttyq bank tóraǵasy atap ótkendei, jobalardy qarjylandyrý máselesinde qarjy sektorynyń mindetti túrde qosymsha qarajat salýy kózdelgen. Bul shara, bir jaǵynan, Ulttyq qorǵa túsetin júktemeni azaitsa, ekinshi jaǵynan, naryqtaǵy ótimdilikti belsendi qoldanýdy qamtamasyz etedi.
Sondai-aq Súleimenov jańa bir investitsiialyq baǵdarlama ázirlenip jatqanyn aitty. Onyń aiasynda ekonomikanyń ozyq sektorlaryndaǵy shaǵyn startaptardy qarjylandyrý kózdelgen. Oǵan bastapqy kezeńde qarjy Ulttyq qordyń balamaly investitsiialar portfelinen bólinedi.
"Bul strategiialyq mańyzy bar iri jobalardan bólek, salystyrmaly túrde shaǵyn startaptar bolady. Olardy qarjylandyrýda Astana halyqaralyq qarjy ortalyǵy (AHQO) infraqurylymyn da paidalanamyz", – dedi ol.
Ulttyq bank basshysy bul sharalar jeke kapital naryǵyn ilgeriletýge, sondai-aq Qazaqstanǵa syrtqy qarjy tehnologiialary men saraptamasyn tartýǵa septigin tigizetinine senimdi.
"Bul tek qosymsha investitsiia tartýmen shektelmeidi. Qarjy naryǵy men tehnologiialar salasyndaǵy tájiribe almasý jaǵy da tereńdeidi, al AHQO áleýeti burynǵydan da keńinen qoldanysqa ie bolady", – dep sózin túiindedi Súleimenov.
