Qazaqstan Ulttyq banki 2024 jyly aqpanda Ulttyq qordan 609 mln dollar satqan, dep habarlaıdy Dalanews.kz.

Aqpannyń qorytyndysy boıynsha teńge baǵamy 0,6%-ǵa álsiredi. Qazaqstan qor bırjasyndaǵy saýda-sattyqtyń ortasha kúndik kólemi bir aıda 172 mln AQSH dollarynan 187 mln AQSH dollarǵa deıin ulǵaıdy. Saýda-sattyqtyń jalpy kólemi 3,9 mlrd AQSH dollardy kórsetti.

"Ulttyq qordan respýblıkalyq búdjetke transfertterdi qamtamasyz etý úshin valúta satý aqpanda 609 mln AQSH dollaryn qurady. Ulttyq qordan satý úlesi jalpy saýda-sattyq kóleminiń 16%-yn jáne kúnine 29 mln AQSH dollarynan aspaıtyn mólsherde boldy. Ulttyq Bank Ulttyq qordyń qarajatymen operasıalar júrgizý kezinde naryqtyq beıtarap qaǵıdatyn saqtaıdy. Bul shetel valútasyn udaıy jáne birkelki satýdy bildiredi. Bul tájirıbe Ulttyq qor operasıalarynyń valúta naryǵyna áserin barynsha azaıtýǵa múmkindik beredi", - dep habarlady Ulttyq bank.

Ulttyq Bank BJZQ zeınetaqy aktıvteriniń valútalyq úlesin 30% deńgeıinde ustap turý maqsatynda aqpanda bırjalyq saýda-sattyqta shetel valútasyn satyp alýdy jalǵastyrdy. Onyń jalpy somasy 400 mln AQSH dollaryn nemese naryqtyń jalpy kóleminiń shamamen 10%-yn qurady.

Al naýryz aıynda Ulttyq bank 700-800 mln AQSH dollaryna teń valúta satýdy josparlap otyr. Odan túsken qarjy respýblıkalyq búdjetke transfert retinde jumsalady