Qazaqstannyń ulttyq qaýipsizdik komitetiniń (UQK) tóraǵasy Vladimir Jumaqanovtyń habarlaýynsha, ekstremistik jáne terroristik qylmystarǵa jaýapkershilikti kúsheitýdi qarastyratyn zań jobasy daiyndaldy.
Jumaqanov jańa joba týraly úkimet otyrysynda málimdedi. Jinalys Almatyda 18 shildedegi shabýyldan qaza bolǵandardy bir minýt únsiz eske alýmen bastaldy.
Úkimet otyrysynda shabýyldan qaza bolǵandar sany altyǵa jetkeni aityldy. Almaty ortalyǵyndaǵy atys barysynda jaralanǵan politsiia qyzmetkeri seisenbi kúni aýrýhanada jan tapsyrdy. Buǵan deiin dúisenbidegi atystan úsh politsiia qyzmetkeriniń qaza bolǵany habarlanǵan edi.
UQK tóraǵasynyń aitýynsha, úkimet qaraýyna usynylǵan túzetýler ekstremizm jáne terrorizm úshin jazaǵa múlikti tárkileýdi mindetti shara retinde engizýdi qarastyrady. Osy túzetýde terrorlyq shabýyldardan qorǵanýǵa daiyn emes uiymdardyń jumysyn tiisti zań talaptaryn oryndaǵansha toqtatýdy qarastyrady, dep túsindirdi Jumaqanov.
Astanada ótken úkimet otyrysynda Qazaqstannyń ishki ister ministri Qalmuhanbet Qasymov ózi basqaratyn mekemeniń sheteldegi áskeri is-qimyldarǵa qatysqandardy azamattyqtan shyǵarý týraly zań jobasyn daiyndap jatqanyn málimdedi.
