قازاقستاننىڭ ۇلتتىق قاۋىپسىزدىك كوميتەتىنىڭ (ۇقك) ءتوراعاسى ۆلاديمير جۇماقانوۆتىڭ حابارلاۋىنشا، ەكسترەميستىك جانە تەرروريستىك قىلمىستارعا جاۋاپكەرشىلىكتى كۇشەيتۋدى قاراستىراتىن زاڭ جوباسى دايىندالدى.
جۇماقانوۆ جاڭا جوبا تۋرالى ۇكىمەت وتىرىسىندا مالىمدەدى. جينالىس الماتىدا 18 شىلدەدەگى شابۋىلدان قازا بولعانداردى ءبىر مينۋت ءۇنسىز ەسكە الۋمەن باستالدى.
ۇكىمەت وتىرىسىندا شابۋىلدان قازا بولعاندار سانى التىعا جەتكەنى ايتىلدى. الماتى ورتالىعىنداعى اتىس بارىسىندا جارالانعان پوليسيا قىزمەتكەرى سەيسەنبى كۇنى اۋرۋحانادا جان تاپسىردى. بۇعان دەيىن دۇيسەنبىدەگى اتىستان ءۇش پوليسيا قىزمەتكەرىنىڭ قازا بولعانى حابارلانعان ەدى.
ۇقك ءتوراعاسىنىڭ ايتۋىنشا، ۇكىمەت قاراۋىنا ۇسىنىلعان تۇزەتۋلەر ەكسترەميزم جانە تەرروريزم ءۇشىن جازاعا مۇلىكتى تاركىلەۋدى مىندەتتى شارا رەتىندە ەنگىزۋدى قاراستىرادى. وسى تۇزەتۋدە تەررورلىق شابۋىلداردان قورعانۋعا دايىن ەمەس ۇيىمداردىڭ جۇمىسىن ءتيىستى زاڭ تالاپتارىن ورىنداعانشا توقتاتۋدى قاراستىرادى، دەپ ءتۇسىندىردى جۇماقانوۆ.
استانادا وتكەن ۇكىمەت وتىرىسىندا قازاقستاننىڭ ىشكى ىستەر ءمينيسترى قالمۇحانبەت قاسىموۆ ءوزى باسقاراتىن مەكەمەنىڭ شەتەلدەگى اسكەري ءىس-قيمىلدارعا قاتىسقانداردى ازاماتتىقتان شىعارۋ تۋرالى زاڭ جوباسىن دايىنداپ جاتقانىن مالىمدەدى.
