Ulttyq paralimpiada quramasy Beijińge attanady
Beijiń-2022 qysqy Paralimpiada oiyndaryna qazaqstandyq delegatsiia koronovirýs indetine qarsy barlyq sanitarlyq sharalardy qoldanyp, qatań karantin rejiminde attanady. Sońǵy úsh jeti boiy paralimpiadashylar Almaty obylysy Talǵar aýdanyndaǵy «Alataý» shańǵy-biatlon kompleksinde karantin rejimin qatań saqtap, Paralimpiada oiyndaryna aqtyq oqý-jattyǵý jiyndaryn ótkizdi.
«Paralimpiada oiyndary - álemdik sporttyq qaýymdastyǵy úshin eń mańyzdy sporttyq shara. Sońǵy jyldary, biz sportshylarymyzdyń turaqty ósýine, oiyndardyń «geografiiasynyń» keńeiýine jáne álemdik qoǵamdastyqtyń nazary artyp kele jatqanyna kýá bolyp otyrmyz. Paralimpiada sportshylary, sender kedergiler men qiyndyqtardy senimdi eńserip, bizge batyldyqtyń qandai bolatyndyǵyn óz úlgilerinde maqsatqa jetý arqyly dáleldep júrsińder. Sizderge sáttilik, ózińizge degen senim men berik rýh tileimin»- dep Ulttyq Paralimpiada komitetiniń prezidenti Q.Boranbaev sportshylarǵa arnalǵan úndeýde atap ótti.
Paralimpiada sportshylaryna ataqty ártister de qoldaý kórsetti. Qysqy Paralimpiada oiyndarynyń aldynda ánshi, kompozitor Erlan Baibazarov paralimpiada sporty týraly «Jasa» atty ánin jazdy. Atap ótetin bolsaq bul qazaqstandyq repertýardaǵy paralimpiada sport túrlerine arnalǵan alǵashqy án. Án Ulttyq paralimpiada komitetiniń sporttyq sharalar men jarystaryn ótkizý barysynda qoldanylatyn bolady.
«Tokio paralimpiada oiyndarynyń jetistikterin kórip, shabyttanǵanym sonshalyq, sol paralimpiadashylar týraly án jazǵym keldi. Negizgi tirekti oilaǵanda, Ǵalymjan Sandalidiń jazǵan áýeninen "Jasa, parasport! Parasport, Alǵa!» degen úzindisi esime tústi. Áýenniń sózderin jazǵan Evgenii Kechin men Ramazan Amantai. Sózderi óte qarapaiym, este saqtaý ońai. Aranjirovkamen Yqylas Nuǵmanov ainalysty. Biz paralimpiadashylar men olardyń jankúierleri arasyndaǵy birlik pen yntymaqtastyq sezimin beineleitin án jasai aldyq dep oilaimyn. «Aleks» kompaniiasyna, Ulttyq paralimpiada komitetine jáne Paralimpiadalyq jattyǵý ortalyǵyna án jazýǵa kómekteskeni úshin alǵys bildiremin», - dedi Erlan Baibazarov.
Erlan Baibazarov rejisser Oljas Nýrbaimen birge «Jasa» ánine beineklip túsirdi. Beinekliptiń tusaýkeseri aǵymdaǵy jyldyń 23 aqpanyna "GAKKU" telearnasynyń efirinde shyǵady dep josparlanǵan.
«Sportshylarmen kezdesip, birge jumys istegennen keiin sezim men emotsiialardyń tutas palitrasyn sezindim. Onyń ishinde: tańdaný, optimizm, qaisarlyq pen jeńis saltanaty. Klipti túsirý barysynda tórt maqsatty kózdedim. Birinshiden, múgedek balalarǵa jáne olardyń ata-analaryna úmit pen múmkindiktin bar ekenin jetkizý, ekinshiden, paralimpiadashylarǵa qurmet kórsetý. Úshinshiden, kórermenderge adam múmkindiginiń sheksizdigen kórsetý. Kliptiń tórtinshi jáne eń mańyzdy maqsaty — inkliýzivti qoǵamdy damytý jáne múgedektigi bar adamdardyń ahýaldaryn jetkizý. Klipte siz naqty paralimpiadashylardyń oidan shyǵarylmaǵan oqiǵalaryn kóresiz. Biz múgedektigi bar adamdardy neǵurlym jii aityp, kórsetetin bolsaq, olar bizdiń ortada soǵurlym mańyzdy jáne eleýli bolady", - dep atap ótti kliptiń rejisseri Oljas Nurbai.
Oǵan qosa áleýmettik jelide (Instagram) «Paralimpiada sportshylaryna jyly tilekterińdi jolda» atty shara iske qosylady. Onlain sharaǵa ataqty mýzykanttar, sportshylar men qoǵam belsendileri qatysady. Atalǵan sharaǵa Qazaqstandaǵy paralimpiada qozǵalysynynyń simvoly beinelengen arnaiy qolǵaptar toqyldy. Jyly syilyqtar Qazaqstan paralimpiada sportshylaryn qoldaý maqsatynda Ulttyq Paralimpiada komitetiniń seriktesi McDonalds kompaniiasy jasady.
