Úkimet Ulytaý óńirinde jańa mektep salý úshin qaitarylǵan aktivterden 1,4 mlrd teńgeden astam qarjy bóldi, dep habarlaidy Dalanews.kz.
Memleket basshysynyń áleýmettik mańyzy bar jobalardy iske asyrý jónindegi tapsyrmasyn oryndaý aiasynda Úkimet Ulytaý oblysynyń Qarajal qalasynda 80 oryndyq mektep salýǵa Arnaýly memlekettik qordan 1,4 mlrd teńgeden astam qarajat bóldi.
Bilim berý nysany «Vokzal» shaǵyn aýdanynda salynady. Búginde shaǵyn aýdanda turatyn balalardyń basym bóligi qalanyń basqa aýdandaryndaǵy mektepterde bilim alýda. Olar eki aýysymda avtobýspen tasymaldanady. Jańa bilim oshaǵynyń qurylysy balalardy zaman talabyna sai oqytýǵa qolaily jaǵdai jasap, bilim alýǵa qol jetkizýin arttyrýǵa múmkindik beredi.
Búgingi tańda Úkimet Arnaýly memlekettik qordan áleýmettik mańyzy bar nysandardyi salýǵa shamamen 56,6 mlrd teńge bóldi. Olardyń qatarynda Atyraý oblysynyń Jamansor, Jetisý oblysynyń Rýdnichnyi jáne Kóksai aýylyndaǵy mektepter, Túrkistan oblysynyń Temirlan aýylyndaǵy mýzykalyq mektep, Aqmola oblysynyń Zerendi aýylyndaǵy sport kesheni, Ridderdegi kópsalaly aýrýhana kesheni, Shymkenttegi jataqhana jáne Aqtóbe men Petropavldaǵy 2 balabaqsha bar.
Arnaýly memlekettik qorǵa aqsha qarajatyn aýdarýdan basqa, «Zańsyz iemdenilgen aktivterdi memleketke qaitarý týraly» Zań sýbektileriniń qarajaty esebinen Arqalyq qalasynda daryndy sportshy balalarǵa arnalǵan sport kesheni, Astanada tirek-qimyl apparaty buzylǵan balalarǵa arnalǵan ońaltý ortalyǵy, Almatyda erekshe qajettilikteri bar adamdarǵa arnalǵan jattyǵý ortalyǵynyń qurylysy júrgizilýde.
Jumys jalǵasýda.
